ԵՐԵՎԱՆ, 9 փետրվարի — Sputnik. Sputnik Արմենիան Հարավային Կորեայից ստացավ ձմեռային օլիմպիական 23-րդ խաղերին նախապատրաստվող Փհենչհանի առաջին կադրերը։
2018 թվականի Ձմեռային օլիմպիական խաղերին Հայաստանից 3 մարզիկ է մեկնել։ Դահուկավազք մարզաձևում Հայաստանը կներկայացնեն Միքայել Միքայելյանն ու Կատյա Գալստյանը, լեռնադահուկային սպորտում` Աշոտ Կարապետյանը։
Sputnik Արմենիայի աշխատակիցները` սպորտային մեկնաբան Խաչիկ Չախոյանն ու ֆոտոթղթակից Ասատուր Եսայանցը, նույնպես մեկնել են Փհենչյան։
Հայկական պատվիրակության կազմում օլիմպիական շքերթին կմասնակցեն նաև պատվիրակության ղեկավար Գագիկ Բոլշիկյանը, օլիմիպիականներ Կատյա Գալստյանը, Աշոտ Կարապետյանը, դահուկավազքի և լեռնադահուկային սպորտի Հայաստանի հավաքականների մարզիչներ Արթուր Միքայելյանն ու Սեյրան Հարությունյանը, և Հայաստանի դահուկային սպորտի ֆեդերացիայի գլխավոր քարտուղար Գագիկ Սարգսյանը:
2018 թվականի Օլիմպիադայում մրցումները մեկնարկել են փետրվարի 8-ին։ Արդեն հասցրել են պայքարի մեջ մտնել կյոռլինգ մարզաձևը ներկայացնող մարզիկները, ցատկորդներն ու գեղասահորդները։
Օլիմպիադայի թալիսմաններն են դարձել Սուխորանգ վագրի ձագը (Օլիմպիական խաղերի համար) և Բանդաբի արջուկը (Պարալիմպիկ խաղերի համար)։ Սուխորանգ սպիտակ վագրը բոլոր մարզիկների և երկրպագուների պաշտպանն է։ Կենդանին սերտ կապ ունի կորեական դիցաբանության հետ, վստահության, ուժի և պաշտպանության խորհրդանիշ է համարվում։
Ասիական սև արջը ուժեղ կամք և արիություն է խորհրդանշում։ Նրա անունը Բանդաբի է, որը երկու իմաստ ունի` «կիսալուսին» և «խաղերի տոն»։
Փհենչհանում Օլիմպիական խաղերին հայկական թիմից առաջինը ելույթ կունենա Կատյա Գալստյանը։ Ելույթը կեզրափակի Աշոտ Կարապետյանը։
23-րդ ձմեռային օլիմպիական խաղերի մեկնարկը կտրվի փետրվարի 9-ին, Երևանի ժամանակով 15:00-ին:
