ԵՐԵՎԱՆ, 12 փետրվարի — Sputnik. Ուկրաինական «Երկրի ձայնը» շոուի ժամանակ հայ երգչուհի Սրբուհի Սարգսյանի հիանալի ելույթը իսկական ֆուրոր է առաջացրել։
«Ես այս շոուին եկել եմ, որպեսզի տեսնեմ քեզ։ Դու էներգիայի, ձայնի, խանդավառության, հոգու համադրություն ես։ Դե, ամեն ինչ իրար հետ։ Ես ուղղակի ցնցված եմ», — ասել է ժյուրիի անդամներից մեկը` երգչուհի Ջամալան։
Սրբուհին ասել է, որ Հայաստանից է եկել, և նրա ասածը համընդհանուր հիացմունք է առաջացրել։
«Բարև ձեզ», — ողջունել է նրան Ջամալան, որը մորական կողմից հայ է։
Աղջկան իր թիմ տանելու համար Սերգեյ Բաբկինն իր հերթին խոստովանել է, որ իր կինը` Սնեժանան, կիսով չափ հայ է։ Նա Սրբուհու վոկալային տվյալների մասին ասել է. «Թվում էր` դուք կանգ չեք առնի, դուք այնպես էիք բարձրանում վերև ու վերև։ Որտե՞ղ է սահմանը»։
Պոտապն ապարդյուն փորձել է իր տոհմածառում հայկական արմատներ գտնել։
«Ես հիմա ինձ մոտ հայկական արմատներ եմ որոնում, փորձում եմ… հիմա… իսկ հրեա չի՞ լինի», — ասել է Պոտապը` չիմանալով, թե ուրիշ ինչ մտածի։
Սակայն երբ իմացել է, որ Սրբուհուն շատ հոգեհարազատ է գոսպել երաժշտական ժանրը, Պոտապն իսկույն հիշեցրել է, որ հիփ-հոփը դուրս է եկել այդ ժանրից։
«Գիտե՞ս` ես կառչում եմ դրանից, քանի որ ես հիփ-հոփ երաժշտությունից եմ դուրս գալիս, բայց քչերը գիտեն, որ հիփ-հոփը սերում է գոսպելից…», — ասել է նա։
Պոտապի խոսքով` նրան շատ են դուր գալիս հզոր էներգետիկայով աղջիկները։
«Հզոր, վայրի էներգետիկայով։ Ինձ դուր են գալիս այսպիսի տաքարյուն կանայք։ Ես սիրում եմ կրքոտ, ուժեղ կանանց…», — ավելացրել է նա։
Երբ հասել է Սրբուհու ընտրության պահը, աղջիկը բոլորի համար անսպասելիորեն ասել է. «Սիրտս ընտրում է Պոտապին»։
Երգչուհին ասել է, որ շոուին մասնակցել է հոր խորհրդով։ Սրբուհին կարծում է, որ «Երկրի ձայնը» շոուին մասնակցելը խթան կհանդիսանա իր կարիերայի համար։
Սրբուհի Սարգսյանը մասնակցել է «Շանթ» հեռուստաընկերությամբ հեռարձակվող X ֆակտոր նախագծին և երկրորդ տեղն է զբաղեցրել։
