ԵՐԵՎԱՆ, 12 փետրվարի — Sputnik. Ապրիլի 22-ին հազարավոր մարդիկ կհավաքվեն Նյու Յորքի հանրահայտ Թայմս Սքուեր հրապարակում՝ Հայոց ցեղասպանության 103-րդ տարելիցի կապակցությամբ, հայտնում է Massis Post-ը:
Ցույցին մի քանի հազար մարդ կմասնակցի, այդ թվում ԱՄՆ–ի և աշխարհի այլ երկրների հայկական սփյուռքի ներկայացուցիչներ` գիտնականներ, իրավապաշտպաններ, արվեստագետներ, քաղաքական գործիչներ և այլն։ Ակցիայի մասնակիցները հարգանքի տուրք կմատուցեն ոչ միայն Հայոց ցեղասպանության, այլև Հոլոքոստի, ինչպես նաև XX դարում տեղի ունեցած զանգվածային այլ բոլոր սպանությունների զոհերի հիշատակին։
Միջոցառման շրջանակներում կներկայացվի թուրք պատմաբան Թաներ Աքչամի «Հրամայում եմ սպանել» նոր գիրքը. մենագրություն, որը նվիրված է Հայոց ցեղասպանության հետ կապված դատական գործընթացների փաստաթղթերի ուսումնասիրմանը։
Ակցիային կարող են մասնակցել բոլոր ցանկացողները։
