ԵՐԵՎԱՆ, 21 փետրվարի — Sputnik. Ռուսաստանը կսկսի արտաքսել «օրենքով գողերին». ֆուտբոլի աշխարհի առաջնության հետ կապված` ուժեղացնելու են քրեական տարրերի զտումները։
«Քրեական հեղինակություններին» արտաքսելու որոշումն ընդունել է անձամբ ներքին գործերի նախարար Վլադիմիր Կոլոկոլցևը։
Ինչպես հաղորդել են «Կոմսոմոլսկայա պրավդային» ՆԳՆ քրեական հետախուզության գլխավոր վարչությունից, այժմ պատրաստվում են երկրից Վրաստան արտաքսել 51-ամյա Ալսան Կոբուլաձեին և Սուլիկո Շարիկաձեին, իսկ Ղրղըզստան կուղարկեն 43-ամյա Կամչիբեկ Կոլբաևին։ Մինչև այդ Ռուսաստանից Վրաստան էր վտարվել Բաչուկա Պաչուլիան (Պոնտացի), իսկ Ադրբեջան` Դադաշ Բաքինսկին։
Պարբերականի աղբյուրների կարծիքով` հիմա ակտիվ են 432 «օրենքով գողեր»։ Նրանցից ազատության մեջ է 318-ը, 114-ը բանտարկված են, 31-ը` քննության տակ են, 19-ը` հետախուզության մեջ։ «Քրեական հեղինակությունների» շարքում ավելի շատ Վրաստանի քաղաքացիներ են (242), ռուսներ (51), հայեր (30), եզդիներ (26), ադրբեջանցիներ (16), աբխազներ (10), չեչեններ (8), հրեաներ (7)։
Արտաքսումն իրականանում է Քրեական օրենսգրքի հիման վրա։ Ավելի հաճախ «օրենքով գողերին» ձերբակալում են խարդախության, թմրանյութեր պահելու և վաճառելու համար։ Նրանք բանտում կրում են պատիժը, իսկ ժամկետը լրանալուց հետո նրանց հանձնում են որոշում Ռուսաստանից արտաքսելու մասին, ինչն ավտոմատ կերպով փակում է հետդարձի ճանապարհը։
