ԵՐԵՎԱՆ, 22 փետրվարի — Sputnik. Երևանի և մարզերի երաժիշտները բացառիկ հնարավորություն կունենան ամիսը մեկ անգամ ելույթ ունենալ կամերային երաժշտության տան բեմում։ Այդ մասին այսօր Sputnik Արմենիա մամուլի կենտրոնում տեղեկացրեց կամերային երաժշտության ազգային կենտրոնի տնօրեն, ալտահար Վաչե Հովեյանը։
Նոր նախագծի շրջանակում 30 երիտասարդ երաժիշտներ Հայաստանի տարբեր անկյուններից կարող են ելույթ ունենալ հայտնի հայկական համույթների հետ։
«Ես արդեն 12 տարի դասավանդում եմ կոնսերվատորիայում և գիտեմ, թե ինչի են ընդունակ երիտասարդ երաժիշտները` ինչպես են երգում, ինչպես նվագում։ Բայց միայն ես չեմ ընտրում նոր նախագծի մասնակիցներին։ Խորհրդակցում եմ կոնսերվատորիայի ռեկտորի, դեկանների, այլ երաժիշտների հետ։ Դրանից հետո լսումներ ենք անցկացնում», — նշեց նա։
Հովեյանը հավելեց, որ նման նախագծերը կարող են խթան լինել երաժիշտների համար, որոնք պարտավոր են ձգտել դեպի աշխարհի մեծ բեմեր։
Ալտահարի խոսքով` այս տարվա մայիսին տեղի կունենա մեկ այլ կարևոր միջոցառում. կամերային նվագախմբի երաժիշտները կնշեն Պետական ակադեմիական երգչախմբի գեղարվեստական ղեկավար, Հայաստանի ազգային հերոս Հովհաննես Չեքիջյանի 90-ամյակը։
Երիտասարդ երաժիշտները պատմեցին իրենց զգացողությունների մասին` կապված «Ճանապարհ երիտասարդ երաժիշտներին» ծրագրին մասնակցելու հետ։ Երևանի Կոմիտասի անվան պետական կոնսերվատորիայի ուսանողուհի Արուսյակ Դավթյանը կարծում է, որ նման նախագծերը շատ կարևոր են երիտասարդ երաժիշտների համար և նպաստում են երաժշտության աշխարհում նրանց առաջմղմանը։
Կոնսերվատորիայի մեկ այլ ուսանողուհի Անի Բալյանը նույնպես խոսեց երիտասարդ երաժիշտների համար նման հարթակներ ստեղծելու կարևորության մասին։
«Ես անչափ ուրախ եմ այդ նախագծին մասնակցելու համար։ Ինձ համար դա պատասխանատու և կարևոր ելույթ է», — նշեց նա։
կարծում է ջութակահար, կոնսերվատորիայի ուսանող Էդմոնդ Հովհաննիսյանն էլ ասաց, որ «Ճանապարհ երիտասարդ երաժիշտներին» նախագծի բացմանը ելույթ ունենալը մեծ պատիվ է։
«Շնորհակալ եմ պարոն Հովեյանին, որն ինձ հնարավորություն տվեց ելույթ ունենալ այս բեմում։ Մեզանից պահանջվում է լիակատար նվիրում, տքնաջան աշխատանք, որպեսզի ցույց տանք մեր հնարավորությունները», — հավելեց Հովհաննիսյանը։
Նա նշեց, որ կոնսերվատորիայի որոշ ուսանողներ գրեթե մեկ տարի աշխատում են Հայաստանի Ազգային կամերային նվագախմբի հետ, և թանկարժեք փորձ են ձեռք բերել։
Կամերային երաժշտության ազգային կենտրոնի փոխտնօրեն Աննա Չուգուլյանն իր հերթին նշեց, որ միջոցառման շրջանակում տեղի կունենան վարպետության դասեր և ելույթ կունենան աշխարհահռչակ երաժիշտներ։
