ԵՐԵՎԱՆ, 22 փետրվարի — Sputnik. Հայկական կողմը ողջունում է Լիբանանի դիրքորոշումն արցախյան հակամարտության վերաբերյալ, լրագրողներին ասաց Հայաստանի ԱԳՆ ղեկավար Էդվարդ Նալբանդյանը Երևանում նախագահական նստավայրում լիբանանյան պատվիրակության հետ բանակցություններից հետո։
Հայաստանի և Լիբանանի նախագահներ Սերժ Սարգսյանի և Միշել Աունի բանակցությունները կայացել են փետրվարի 22-ին Երևանում։
«Այդ դիրքորոշումն ի աջակցություն է ԵԱՀԿ Մինսկի խմբի համանախագահների ջանքերին և մոտեցումներին, իսկ Մինսկի խմբի նախագահների համապատասխան մոտեցումները հայտնի են», — ասաց արտգործնախարարը։
Նրա խոսքով՝արցախյան հակամարտության կարգավորման հարցում Լիբանանի մոտեցումը բացառապես խաղաղ ճանապարհով լուծումն է, և այն առաջարկների հիման վրա, որոնք արվում են Մինսկի խմբի համանախագահների կողմից։
Ինչ վերաբերում է Լիբանանի նախագահի` Հայաստան կատարած այցին, նա միանշանակ կնպաստի երկկողմանի հարաբերությունների զարգացմանը։
«Մենք Լիբանանի հետ ունենք ավանդական, ջերմ, բարեկամական հարաբերություններ և երկու կողմից էլ ձգտում կա այդ հարաբերություններն առավել զարգացնելու և խորացնելու», — ասաց Նալբանդյանը։
Սերժ Սարգսյանի հետ հանդիպումից բացի Աունը բանակցություններ կվարի վարչապետ Կարեն Կարապետյանի և խորհրդարանի խոսնակ Արա Բաբլոյանի հետ։ Հայաստանի ու Լիբանանի նախագահները վերջին անգամ հանդիպել են 2012 թվականի նոյեմբերին Սերժ Սարգսյանի` Բեյրութ կատարած այցի ժամանակ։
Սա Միշել Աունի առաջին պաշտոնական այցն է Երևան նախագահի պաշտոնում ընտրվելուց հետո։ Լիբանանյան պատվիրակության կազմի մեջ մտել են ՆԳՆ ղեկավար Նուհադ Ալ Մաշնուկը, ԱԳՆ ղեկավար Ջեբրան Բասիլը, զբոսաշրջության նախարար Ավետիս Կիտանյանը, արդյունաբերության նախարար Հուսեյն Հաջ Հասանը, Դաշնակցություն կուսակցությունից խորհրդարանի պատգամավոր Հակոբ Բագրատունին։
