ԵՐԵՎԱՆ, 28 փետրվարի — Sputnik. Ուղեբեռի անցկացման նորմերով «Աերոֆլոտը» ռուսական ամենալոյալ ավիաընկերություններից է։ Այս մասին հայտնում է ՌԻԱ Նովոստին։
Այս շաբաթ ավիափոխադրողը մեծացրել է ձեռքի ուղեբեռի թույլատրելի առավելագույն չափերը։
«Աերոֆլոտն» ավելացնում է ձեռքի ուղեբեռի թույլատրելի չափերը։ Այժմ ձեռքի ուղեբեռը կարող է ունենալ 55 սմ երկարություն, 40 սմ լայնություն և 25 սմ բարձրություն։ Ռուսական ավիափոխադրողների մեծ մասի մոտ այս սահմանափակումը 20 սմ է։
«Որոշիչ է հենց այդ հինգ սանտիմետրն։ Ճամպրուկների, տեսախցիկների պայուսակների ու ճանապարհային պայուսակների բարձրությունը հիմնականում 23-25 սանտիմետր է», — նշված է հոդվածում։
Ռուսական կանոնների համաձայն `ավիափոխադրողներն իրենք են որոշում անվճար ձեռքի ուղեբեռի քաշի սահմանը, որը, սակայն, չի կարող հինգ կիլոգրամից պակաս լինել։
«Ուղևորն իրավունք ունի օդանավի սրահ տանել ուսապարկ, պայուսակ կամ պորտֆել, վերնահագուստ, ծաղկեփունջ, մանկական սնունդ` թռիչքի ընթացքում երեխային կերակրելու համար, կոստյում, մանկական սայլակ, անթացուպ, ձեռնափայտ և կազդուրման այլ տեխնիկական միջոցներ, դեղորայք, նաև Duty Free խանութներում գնված ապրանք։ Այս ցուցակից դուրս են մնացել հեռախոսները, տեսախցիկները, էլեկտրոնային այլ սարքավորումները, հովանոցներն ու գրքերը, քանի որ դրանք կարելի է տեղավորել պայուսակի, պորտֆելի կամ ուսապարկի մեջ»,- նշվում է հաղորդագրության մեջ։
Միաժամանակ ուղևորները դժգոհ են, որ ստիպված են թանկարժեք տեխնիկան որպես բեռ հանձնել։ Հենց այդ պատճառով որոշ ավիաընկերություններն ընդլայնել են տրանսպորտի նախարարության ցուցակն ու թույլ են տալիս տեխնիկա անցկացնել։ Սակայն այդ դեպքում ձեռքի ուղեբեռի թույլատրելի սահմանը նվազագույնի է հասնում։
Ամենախիստը «Պոբեդա» ավիաընկերությունն է։ Լոուքոսթերի չվերթերի ձեռքի ուղեբեռի առավելագույն չափերն են 36x30x27 սմ։ Դա բոլոր իրերի ընդհանուր չափն է, ներառյալ` հագուստը, ծաղիկները, մանկական սնունդը։ Փոխարենը չկան քաշի սահմանափակումներ։
