ԵՐԵՎԱՆ, 6 մարտի — Sputnik. ԱԺ «Ելք» խմբակցությունն առաջարկում է Անվտանգության խորհուրդը դարձնել եռանդամ՝ դրանում ընդգրկելով միայն ՀՀ վարչապետին, ԵՊՀ խորհրդի նախագահին ու Շախմատի ֆեդերացիայի նախագահին։ Այս առաջարկով այսօր Անվտանգության խորհրդի մասին օրենքի նախագծի քննարկման ժամանակ ԱԺ-ում հանդես եկավ «Ելք» խմբակցության պատգամավոր Արարատ Միրզոյանը՝ ակնարկելով, որ խորհրդի նոր կազմը թույլէ տալիս ենթադրել, որ դրանում որոշումները կայացվելու են միանձնյա։
«Ազգային անվտանգության խորհրդում ընդգրկված բոլոր մարդկանց հանել և սահմանել, որ Անվտանգության խորհրդի անդամ կարող են լինել ՀՀ վարչապետը, ԵՊՀ խորհրդի նախագահը և Շախմատի ֆեդերացիայի նախագահը: Դրանով տրամաբանությունը կամբողջացվի: Մեխն էլ է ձեր ձեռը, չագուճն էլ, խփեք թող գնա, մինչև կամ մեխը կջարդվի, կամ չագուճը»,-ասաց Միրզոյանը։
Նշենք, ըստ առաջարկվող նախագծի՝ անվտանգության խորհրդի անդամները կլինեն վարչապետը, փոխվարչապետները, անվտանգության խորհրդի քարտուղարը, ԱԳ և պաշտպանության նախարարները, ԱԱԾ տնօրենը,, ոստիկանապետը, ԶՈւԳՇ պետը։ Հիշեցնենք, որ այժմ Ազգային անվտանգության խորհուրդը գլխավորում է ՀՀ նախագահ Սերժ Սարգսյանը, խորհրդի անդամներն են ՀՀ Ազգային ժողովի նախագահը, ՀՀ վարչապետը, ՀՀ Սահմանադրական դատարանի նախագահը, ՀՀ փոխվարչապետը, ՀՀ Ազգային անվտանգության խորհրդի քարտուղարը, ՀՀ պաշտպանության նախարարը, ՀՀ արտաքին գործերի նախարարը, ՀՀ Նախագահի աշխատակազմի ղեկավարը, ՀՀ գլխավոր դատախազ, ՀՀ ազգային անվտանգության ծառայության տնօրեն, ՀՀ ոստիկանապետը, ՀՀ զինված ուժերի գլխավոր շտաբի պետը:
Նախագծի ընդունման դեպքում այն ուժի մեջ կմտնի Հանրապետության նորընտիր նախագահի կողմից` իր պաշտոնի ստանձնման օրը:
