ԵՐԵՎԱՆ, 16 մարտի — Sputnik. Նորին Գերազանցություն Թաիլանդի Թագավորության արքայադուստր Մահա Չակրի Սիրինդհորնը մարտի 16-ին այցելեց Մեսրոպ Մաշտոցի անվան Մատենադարան և հիացավ այնտեղ պահվող ձեռագրերով։ Sputnik Արմենիային այս մասին հայտնեց «Մատենադարանի» պաշտոնական կայքի խմբագիր Արամ Թորոսյանը։
Նրա խոսքով` Երևանում արքայադստեր առաջին գործը եղավ Մատենադարան այցելելը։
Արքայադուստրը շրջայց կատարեց նաև Մատենադարանի արխիվային պահոցում, ձեռագրատանը, ծանոթացավ Մատենադարանի վերականգնման բաժնի աշխատանքներին:
«Սիրինդհորնը շատ տպավորված էր։ Նա նշեց, որ հայկական ձեռագրերը բացառիկ են»,- ասաց Թորոսյանը։
Սիրինդհորնը երկուսուկես ժամ անցկացրեց Մատենադարանում։ Այցի ավարտին իր ստացած տպավորություններն արքայադուստրը գրառեց Մատենադարանի պատվավոր հյուրերի գրառումների մատյանում։
Մատենադարանի տնօրեն Վահան Տեր-Ղևոնդյանը Մահա Չակրի Սիրինդհորնին արժեքավոր նվերներ հանձնեց։
