ԵՐԵՎԱՆ, 3 մարտի — Sputnik. 222 օր աշխատում ենք, 143 օր` հանգստանում: ՀՀ աշխատանքի և սոցիալական հարցերի նախարարության կատարած այս հաշվարկն այսօր ԱԺ-ում ներկայացրեց փոխնախարար Թադևոս Ավետիսյանը: Կառավարությունն առաջարկում է հանգստյան օրերի հաշվարկից հանել հունվարի 3-ը, 4-ն ու 5-ը` պատճառաբանելով, որ դրանք տոնի հետ կապ չունեն և անհարկի սոցիալ-տնտեսական խնդիրներ են առաջացնում, քանի որ ՀՀ աշխատողներին աշխատավարձ է վճարվում 36 ոչ աշխատանքային օրվա համար:
«Նախագծի ընդունումը կնպաստի հայկական տոնացույցում միայն ավանդական հայկական տոների առկայությանը և պետական մակարդակով նշելուն, կապահովի պետության սոցիալ-տնտեսական և ֆինանսական համակարգերի նորմալ կենսագործունեությունը»,- ասաց փոխնախարարը:
Սակայն պատգամավորներին այնքան էլ չբավարարեցին կառավարության ներկայացրած հիմնավորումները: ԱԺ «Ծառուկյան» խմբակցության պատգամավոր Գևորգ Պետրոսյանը նշեց, որ կառավարության ներկայացրած օրինագծերի հիմնավորումները «սկսել են նմանվել ազատ թեմայով շարադրությունների»:
«Ի՞նչ կապ ունի արձակուրդի երեք օրերը հանելը պետության կենսագործունեության հետ»,- ասաց պատգամավորը: Նա մեջբերեց հիմնավորման ևս մի հատված ու այն աբսուրդ որակեց:
«Մեծանուն լեզվաբան Հրաչյա Աճառյանը հավաստիացնում է, որ «տոնը» բնիկ հայերեն բառ է և նշանակում է հասարակական հանդես, հանդիսավոր օր: Հեռավոր անցյալում տոն է կոչվել աստվածներին մատուցած զոհը, զոհաբերվող կենդանին, որևէ հանդիսության նվիրված խնջույքը,- նախագծից ընթերցեց Պետրոսյանն ու հարց ուղղեց զեկուցողին,- կանանց տոնը ի՞նչ կապ ունի այս ամենի հետ, ո՛չ կանանց զոհաբերում ենք, ո՛չ մատուցում ենք աստվածներին»:
Ի վերջո, կառավարության ներկայացուցիչն էլ ընդունեց, որ նախագիծը շտկումների կարիք ունի և համաձայնեց հետաձգել դրա օրակարգ ներառելը`լրացումներ անելու պայմանով:
