ԵՐԵՎԱՆ, 20 ապրիլի — Sputnik. Որոշ տեղերում սկսում ենք բեռնատարներով փակելու օպերացիան։ Քիչ առաջ ֆեյսբուքյան իր էջում հայտնել է թավշյա հեղափոխության հայտարարած պատգամավոր Նիկոլ Փաշինյանը։
«Խնդրում եմ բոլոր վարորդներին ավտոմեքենաները կանգնեցել ճանապարհներին, թուլացնել անիվները, այնպես անել, որ «խոդ չըկնի», որպեսզի չկարողանան ձեր մեքենաները հեռացնել ճանապարհից»,- ասել է նա։
Նրա խոսքով` եթե բեռնատարների վարորդները կարողանան իրականացնել այդ օպերացիան, կկարողանան ցույց տալ, որ թավշյա հեղափոխության ավարտին մի քանի օր է մնացել։
«Ժողովուրդ ջան, խնդրում եմ ֆոտո կամ տեսանյութեր տեղադրել փակված փողոցներից։ Առայժմ միայն բանավոր ինֆորմացիա է շրջանառվում։ Ինքներդ որոշեք, թե որտեղ փակել, հավաքվեք և իրականացրեք գործողությունը։ Ես ինքս կմեկնեմ Երևանի ամենաակտիվ ինքնակազմակերպման վայրերը»,- գրել է նա։
Ապրիլի 17-ին Ազգային ժողովում անցկացված քվեարկության արդյունքում ՀՀ վարչապետ ընտրվեց Սերժ Սարգսյանը։ «Ելք» խմբակցության ղեկավար Նիկոլ Փաշինյան ու նրա կողմնակիցները դուրս են եկել Երևանի փողոցներ և բողոքում են այս ընտրության դեմ։
Փաշինյանը մարտի 31-ից Հայաստանի տարածքում նախաձեռնել է «Իմ քայլը» արշավը։ Մի քանի օրում Փաշինյանն իր համախոհների հետ ոտքով անցել է ավելի քան 200 կիլոմետր` ակցիաներ անցկացնելով Գյումրիում, Վանաձորում, Սպիտակում, Դիլիջանում, Աբովյանում և Հրազդանում։ Պատգամավորն ու նրա համախոհները բողոքում էին վարչապետի պաշտոնում Սերժ Սարգսյանի թեկնածության առաջադրման դեմ, սակայն նրանց բողոքը չխանգարեց, որ Ազգային ժողովը վարչապետ ընտրի հենց Սարգսյանին։
Երևանում քաղաքացիական անհնազանդության գործողությունները մեկնարկել են ապրիլի 16-ից։
