ԵՐԵՎԱՆ, 21 ապրիլի — Sputnik. Բողոքի ակցիայի մասնակիցները` «Իմ քայլը» նախաձեռնության հեղինակ Նիկոլ Փաշինյանի առաջնորդությամբ, ուղղության են վերցրել դեպի Քանաքեռ-Զեյթուն վարչական շրջան։
Թեև նախապես որոշված էր, և ոստիկանությունն էլ իրազեկված էր, որ երթը Նոր Նորքից անցնելու է Ավանով մինչև «Հարսնաքար» ռեստորանային համալիրին հարակից խաչմերուկ, սակայն հընթացս որոշվեց փոխել երթի ուղղությունը։
Այս պահին Փաշինյանի գլխավորած երթը Մյասնիկյան պողոտայից թեքվեց դեպի Ռուբինյանց փողոց։
Հիշեցնենք` ավելի վաղ ոստիկանությունն արգելեց առանց իրազեկման հավաք անցկացնել Նոր Նորքում, Փաշինյանը տեղում հայտարարեց, որ հավաքը դադարեցված է և ոստիկանությանն իրազեկեց հենց այդ պահին մեկնարկող այլ հավաքի մասին, որն, ըստ իրազեկման, պետք է անցներ Նոր Նորքով և Ավանով։
Ապրիլի 17-ին Ազգային ժողովում անցկացված քվեարկության ժամանակ ՀՀ վարչապետ ընտրվեց Սերժ Սարգսյանը։ «Ելք» խմբակցության ղեկավար Նիկոլ Փաշինյանն ու նրա կողմնակիցները դուրս են եկել Երևանի փողոցներ և բողոքում են այս ընտրության դեմ։
Փաշինյանը մարտի 31-ից Հայաստանի տարածքում նախաձեռնել է «Իմ քայլը» արշավը։ Մի քանի օրում Փաշինյանն իր համախոհների հետ ոտքով անցել է ավելի քան 200 կիլոմետր` ակցիաներ անցկացնելով Գյումրիում, Վանաձորում, Սպիտակում, Դիլիջանում, Աբովյանում և Հրազդանում։ Պատգամավորն ու նրա համախոհները բողոքում էին վարչապետի պաշտոնում Սերժ Սարգսյանի թեկնածության առաջադրման դեմ, սակայն նրանց բողոքը չխանգարեց, որ Ազգային ժողովը վարչապետ ընտրի հենց Սարգսյանին։ Երևանում քաղաքացիական անհնազանդության գործողությունները մեկնարկել են ապրիլի 16-ից։ Փաշինյանը հայտարարել է, որ թավշյա հեղափոխություն է իրականացնում։
