ԵՐԵՎԱՆ, 21 ապրիլի — Sputnik. Ես շփման համար բաց եմ, բայց քննարկման թեման կարող են լինել միայն Սերժ Սարգսյանի հեռացման պայմանները։ Նոր Նորքում կազմակերպված երթի ընթացքում լրագրողներին ասաց «Իմ քայլը» նախաձեռնության» ղեկավար Նիկոլ Փաշինյանը` արձագանքելով Սերժ Սարգսյանի երկխոսության կոչին։
«Եթե Սերժ Սարգսյանն ընդունում է հրաժարականի առաջարկը, նշանակում է` պարտավորվում է հրաժարական տալ և մենք քննարկում ենք նրա հեռացման պայմանները։ Ընդ որում, այդ պայմանները պետք է ընդունելի լինեն ոչ թե ինձ, այլ ժողովրդի համար»,- ասաց Փաշինյանը։
Հիշեցնենք` քիչ առաջ ՀՀ վարչապետ Սերժ Սարգսյանի պաշտոնական կայքում հրապարակված հաղորդագրության մեջ Սարգսյանը երկխոսության ու բանակցության կոչ էր արել Նիկոլ Փաշինյանին։
Ապրիլի 17-ին Ազգային ժողովում անցկացված քվեարկության ժամանակ ՀՀ վարչապետ ընտրվեց Սերժ Սարգսյանը։ «Ելք» խմբակցության ղեկավար Նիկոլ Փաշինյանն ու նրա կողմնակիցները դուրս են եկել Երևանի փողոցներ և բողոքում են այս ընտրության դեմ։
Փաշինյանը մարտի 31-ից Հայաստանի տարածքում նախաձեռնել է «Իմ քայլը» արշավը։ Մի քանի օրում Փաշինյանն իր համախոհների հետ ոտքով անցել է ավելի քան 200 կիլոմետր` ակցիաներ անցկացնելով Գյումրիում, Վանաձորում, Սպիտակում, Դիլիջանում, Աբովյանում և Հրազդանում։ Պատգամավորն ու նրա համախոհները բողոքում էին վարչապետի պաշտոնում Սերժ Սարգսյանի թեկնածության առաջադրման դեմ, սակայն նրանց բողոքը չխանգարեց, որ Ազգային ժողովը վարչապետ ընտրի հենց Սարգսյանին։ Երևանում քաղաքացիական անհնազանդության գործողությունները մեկնարկել են ապրիլի 16-ից։ Փաշինյանը հայտարարել է, որ թավշյա հեղափոխություն է իրականացնում։
