ԵՐԵՎԱՆ, 24 ապրիլի — Sputnik. Մինչ հրաժարականը Սերժ Սարգսյանը կոալիցիոն գործընկեր ՀՅԴ-ին խոստացել էր զիջումներ անել։ Այսօր լրագրողների հետ զրույցում ասաց ՀՅԴ բյուրոյի անդամ Հրանտ Մարգարյանը` հավելելով, որ հրաժարականի մասին խոսք չէր եղել։
«Ժողովուրդն ակտիվացավ, իր իրավունքներին տեր կանգնեց։ Քաղաքական դաշտը ցույց տվեց հասունություն, որ ամեն գնով խուսափի առճակատումից, բախումից։ Եվ ես կարծում եմ` մենք օրինակելի հասունություն ցույց տվեցինք։ Խոսքս բոլորին է վերաբերում։ Այդ կամքը, որ դրսևորվեց, որպեսզի բախում տեղի չունենա, ամենամեծ գնահատականն է, որ կարելի է տալ մեր քաղաքական դաշտին»,- ասաց Մարգարյանը։
Ինչ վերաբերում է ՀՅԴ հետագա անելիքներին, նա նշեց, որ պատրաստ են աշխատել բոլորի հետ` երկրի առջև ծառացած հիմնական խնդիրները լուծելու համար։
Հիշեցնենք, 2017թ-ի խորհրդարանական ընտրություններից հետո ՀՅԴ-ն ՀՀԿ-ի հետ կոալիցիոն հուշագիր էր ստորագրել` կիսելով իշխանության պատասխանատվությունն ու պաշտոններ ստանալով գործադիր իշխանությունում։
Հիշեցնենք` Երևանում 10 օր տևած բողոքի ակցիաներից հետո երեկ` ապրիլի 23-ին, ՀՀ վարչապետ Սերժ Սարգսյանը հրաժարական տվեց։ Օրեր շարունակ տասնյակ հազարավոր մարդիկ ցույցերի էին դուրս եկել` բողոքելով Սերժ Սարգսյանի իշխանության երկարացման դեմ (2008 թվականից նա ղեկավարում էր երկիրը որպես նախագահ, իսկ ապրիլի 17-ին խորհրդարանն ընտրել էր նրան որպես վարչապետ ու պետության փաստացի ղեկավար)։
ՀՀ վարչապետ Սերժ Սարգսյանի հրաժարականից հետո ՀՀ նախագահ Արմեն Սարգսյանն ընդունեց նաև կառավարության հրաժարականը։ Այս պահին կառավարության ղեկավարի պարտականություններն իրականացնում է Կարեն Կարապետյանը։ Նախարարները շարունակում են աշխատել ժամանակավոր պաշտոնակատարների կարգավիճակով։ Նոր վարչապետի ընտրություններն ԱԺ-ում նախատեսվում են հաջորդ շաբաթ։