ԵՐԵՎԱՆ, 24 ապրիլի — Sputnik. Հայոց ցեղասպանության զոհերի հիշատակի օրը հնարավոր չէ բարձր տրամադրություն ունենալ։ Այսօր Ծիծեռնակաբերդում այս մասին լրագրողներին ասաց ՀՀ փոխոստիկանապետ Վալերի Օսիպյանը։
«Ես չեմ հոգնել, ես իմ աշխատանքն եմ կատարում։ Դուք գիտեք, թե այսօր ինչ օր է, ուրախանա՞մ ինչ է», — ասաց Օսիպյանը` պատասխանելով այն հարցին, թե ինչու այդքան տխուր տեսք ունի։
Մեկնաբանելով Հայաստանի վերջին իրադարձությունները`Օսիպյանը նշեց, որ ոստիկանությունը ապաքաղաքական կառույց է։
«Մեր նպատակը հանցավորության դեմ պայքարն է, անվտանգության ապահովումը։ Այն, ինչ անում է ոստիկանությունը, օրենքի սահմաններում է, այդ թվում նաև ուժի ու հատուկ տեխնիկայի կիրառումը», — ասաց Օսիպյանը։
Հիշեցնենք` Երևանում 10 օր տևած բողոքի ակցիաներից հետո երեկ` ապրիլի 23-ին, ՀՀ վարչապետ Սերժ Սարգսյանը հրաժարական տվեց։ Օրեր շարունակ տասնյակ հազարավոր մարդիկ ցույցերի էին դուրս եկել` բողոքելով Սերժ Սարգսյանի իշխանության երկարացման դեմ (2008 թվականից նա ղեկավարում էր երկիրը որպես նախագահ, իսկ ապրիլի 17-ին խորհրդարանն ընտրել էր նրան որպես վարչապետ ու պետության փաստացի ղեկավար)։
ՀՀ վարչապետ Սերժ Սարգսյանի հրաժարականից հետո ՀՀ նախագահ Արմեն Սարգսյանն ընդունեց նաև կառավարության հրաժարականը։ Այս պահին կառավարության ղեկավարի պարտականություններն իրականացնում է Կարեն Կարապետյանը։ Նախարարները շարունակում են աշխատել ժամանակավոր պաշտոնակատարների կարգավիճակով։ Նոր վարչապետի ընտրություններն ԱԺ-ում նախատեսվում են հաջորդ շաբաթ։
