ԵՐԵՎԱՆ, 28 ապրիլի — Sputnik. Սարգսյանը հրաժարականը նախընտրեց արյունահեղությունից։ Իր պաշտոնական կայքում նման կարծիք է հայտնել Վլադիմիր Պոզները` պատասխանելով օգտատերերից մեկի հարցին։
«Ճիշտն ասած դա իմ գործը չէ, այլ Հայաստանի քաղաքացիների։ Թե ինչ էր մտածում պարոն Սարգսյանը, երբ որոշում կայացրեց հրաժարական տալ, ես չգիտեմ։ Բայց կարծում եմ, որ դա հարկադրված քայլ էր, ընտրությունն էր այդպիսին` կամ հրաժարական, կամ արյունահեղություն»,- գրել է Պոզները։
Երկրի վարչապետ և ըստ էության ղեկավար Սերժ Սարգսյանը պաշտոնաթող եղավ ապրիլի 23-ին` զանգվածային բողոքներից հետո։
Դժգոհությունները պայմանավորված էին Սարգսյանի Վարչապետի պաշտոնում առաջադրվելու և ի վերջո ընտրվելու հանգամանքով։
Այժմ վարչապետի պարտականություններն իրականացնում է Կարեն Կարապետյանը, որը մինչև այդ զբաղեցնում էր փոխվարչապետի պաշտոնը։
