ԵՐԵՎԱՆ, 29 ապրիլի — Sputnik. «Իմ քայլը» ընդդիմադիր շարժման առաջնորդ Նիկոլ Փաշինյանը լավ վերաբերմունք ունի Ռուսաստանի նկատմամբ և շարունակելու է զարգացնել հարաբերությունները Մոսկվայի հետ։ Նիկոլ Փաշինյանն այս մասին ասել է խորհրդարանում Պետդումայի ԱՊՀ գործերով, եվրասիական ինտեգրման ու հայրենակիցների հետ կապերի կոմիտեի ղեկավար Լեոնիդ Կալաշինկովի հետ հանդիպման ժամանակ։
Ռուս պատգամավորների և սենատորների պատվիրակությունը Երևան է ժամանել ուրբաթ` ապրիլի 27-ին։ Շաբաթ օրը նրանք հանդիպում են ունեցել ՀՀ ԱԺ բոլոր խմբակցությունների հետ։
«Փաշինյանը հանդիպման ժամանակ ներկայացրել է Հայաստանում տեղի ունեցող իրադարձությունների իր հայտնի դիրքորոշումը` ընդգծելով Ռուսաստանի նկատմամբ ունեցած իր լավ վերաբերմունքը», — ասել է Կալաշնիկովը։
Նա ընդգծել է բոլոր հարցերը սահմանադրական դաշտում լուծելու անհրաժեշտությունը` հույս հայտնելով, որ խորհրդարանում քվեարկությունը կանցնի առանց արտաքին ճնշումների։
«Պատգամավորները պետք է ազատ կամարտահայտման հնարավորություն ունենան», — ընդգծել է նա։
Կալաշնիկովը մտահոգություն է հայտնել նաև Փաշինյանի` ԵԱՏՄ-ից դուրս գալու դիրքորոշման վերաբերյալ։
Հիշեցնենք, որ Երևանում 10 օր տևած բողոքի ակցիաներից հետո ապրիլի 23-ին ՀՀ վարչապետ Սերժ Սարգսյանը հրաժարական տվեց։ Օրեր շարունակ տասնյակ հազարավոր մարդիկ ցույցերի էին դուրս եկել` բողոքելով Սերժ Սարգսյանի իշխանության երկարացման դեմ (2008 թվականից նա ղեկավարում էր երկիրը որպես նախագահ, իսկ ապրիլի 17-ին խորհրդարանն ընտրել էր նրան որպես վարչապետ ու պետության փաստացի ղեկավար)։
ՀՀ վարչապետ Սերժ Սարգսյանի հրաժարականից հետո ՀՀ նախագահ Արմեն Սարգսյանն ընդունեց նաև կառավարության հրաժարականը։
Հետո «Իմ քայլը» նախաձեռնությունը պայքարում էր, որ իշխող ՀՀԿ–ն չառաջադրի վարչապետի իր թեկնածուին։ Ապրիլի 25–ից նրանք կրկին բողոքի ակցիաներ ու հանրահավաքներ են անցկացնում ոչ միայն Երևանում, նաև` ՀՀ այլ քաղաքներում։
Ապրիլի 28–ին ՀՀԿ մամուլի քարտուղար Էդուարդ Շարմազանովը հայտարարեց, որ ՀՀԿ խմբակցությունը վարչապետի իր թեկնածուն չի առաջադրի` երկիրը հետագա ցնցումներից զերծ պահելու համար։