ԵՐԵՎԱՆ, 30 ապրիլի — Sputnik. Եվրոպայի գլխավոր երաժշտական մրցույթում` «Եվրատեսիլ 2018»-ում, Հայաստանի ներկայացուցիչ Սևակ Խանաղյանն անցկացրել է Qami մրցութային երգի փորձը։
Eurovision-ի պաշտոնական էջի ադմինիստրատորները Instagram-ում տեղադրել են տեսահոլովակներ և լուսանկարներ` մակագրելով «Սևակ Խանաղյանի հզորագույն ելույթը փորձի ժամանակ»։
Սևակի ելույթի լուսանկարի տակ բազմաթիվ մեկնաբանություններ են գրել աշխարհի տարբեր երկրներից` Հունաստանից, Հայաստանից, Ռուսաստանից և այլն։ Օգտատերերը հայ մասնակցին հաջող ելույթ են մաղթել մրցույթի եզրափակիչ փուլում։
Հիշեցնենք, որ «Եվրատեսիլ» 63-րդ երաժշտական մրցույթն առաջին անգամ կանցկացվի Պորտուգալիայի մայրաքաղաք Լիսաբոնում։ Կիսաեզրափակիչները տեղի կունենան մայիսի 8-ին և 10-ին, իսկ եզրափակիչը` մայիսի 12-ին։
