«Ծառուկյան» խմբակցության բոլոր 31 պատգամավորները վաղը կքվեարկեն ժողովրդական թեկնածուի օգտին։ Այս մասին այսօր «Ելք» խմբակցության հետ հանդիպումից հետո լրագրողներին հայտնեցին «Ծառուկյան» խմբակցության պատգամավորները։
Անդրադառնալով հետագա ծրագրերին` մասնավորապես՝ ապագա կառավարության կազմավորմանը, Նաիրա Զոհրաբյանը հայտնեց, որ նման հարց հանդիպման ընթացքում չի քննարկվել։ Իսկ կլինի ԲՀԿ-ն կառավարության կազմում, թե՞ ոչ հարցին, Զոհրաբյանը պատասխանեց. «Մենք առանց նախապայմանների ենք միացել ժողովրդական շարժմանը»։
Ինչ վերաբերում է գործող խորհրդարանի լուծարմանն ու նոր արտահերթ ընտրությունների անցկացմանը, Նաիրա Զոհրաբյանն ասաց, որ այդ հարցով բոլոր քաղաքական ուժերի հետ քննարկումներն ընթացքի մեջ են։
«Քննարկումների արդյունքում պետք է սահմանվեն օպտիմալ, ռեալ ժամկետներ՝ անցկացնելու այնպիսի ընտրություններ, որ նորից չասեն՝ հերթական շըփ-թըփ ընտրություններն անցկացվեցին»-ասաց Զոհրաբյանը։
Բացի այդ, արտահերթ ընտրություն անցկացնելու համար անհրաժեշտ է քաղաքական ուժերի համատեղ, կոնսենսուսային որոշում։ Իսկ թե օրենքի որ դրույթով է լուծարվելու խորհրդարանն ու նոր ընտրություն նշանակվելու, քաղաքական ուժերը, որոնց թվում և «Ծառուկյան» խմբակցությունն, առայժմ չեն բացահայտում։
Որպեսզի Հայաստանում Ազգային ժողովի նոր` արտահերթ ընտրություններ նշանակվեն` առանց Սահմանադրությունը խախտելու, խորհրդարանը պետք է կա՛մ վարչապետ չընտրի, կա՛մ ընտրելուց հետո մերժի նրա ձևավորած կառավարության ծրագիրը։
Նշենք` մայր օրենքի 149-րդ հոդվածի համաձայն` վարչապետի հրաժարական ներկայացնելու դեպքում կառավարության հրաժարականն ընդունվելուց հետո 7-օրյա ժամկետում Ազգային ժողովի խմբակցություններն առաջադրում են վարչապետի թեկնածուներ:
Հայաստանում այս պահին իրավիճակը համապատասխանում է այս դրույթին։ Ապրիլի 23-ին ՀՀ նախագահն ընդունեց վարչապետ Սերժ Սարգսյանի ու նրա կազմավորած նոր կառավարության հրաժարականը։ Ասել է թե մինչև ապրիլի 30-ը խորհրդարանական ուժերը պետք է ներկայացրած լինեն վարչապետի իրենց թեկնածուներին։ Սակայն խնդիրն այն է, որ վարչապետի սեփական թեկնածու առաջադրելու համար անհրաժեշտ է պատգամավորների ընդհանուր թվի առնվազն մեկ երրորդը, այսինքն` 35 ձայն։
Հիշեցնենք, որ մեր Ազգային ժողովում միայն Հանրապետականն ունի անհրաժեշտ քանակով ձայներ: «Ծառուկյան» խմբակցությունն ունի 31, «Ելք»-ը` 9, ՀՅԴ-ն` 7 մանդատ։ Սեփական թեկնածու առաջադրելու համար նրանց անհրաժեշտ կլինի միավորվել։
«Ելք» դաշինքը հայտարարել է, որ վարչապետի պաշտոնում առաջադրելու է Նիկոլ Փաշինյանի թեկնածությունը։
