ԵՐԵՎԱՆ, 2 մայիսի — Sputnik. Գյումրիում Հանրապետական կուսակցության անդամները զանգվածաբար լքում են կուսակցության շարքերը։ Այս մասին տեղեկացնում է Sputnik Արմենիայի թղթակիցը Գյումրիից։
Այսօր անհնազանդության հերթական ակցիայի ժամանակ հանրապետականներից շատերը ի տես բոլորի հանձնեցին իրենց անդամատոմսերը։ Մեր թղթակցի տեղեկացմամբ` այս պահին նրանց թիվը 13-ն է։ Նրանց մեջ է նաև Հովհաննես Շիրազի տուն-թանգարանի տնօրեն Արա Պապանյանը։
Ավելի քան 1 ժամ կաթվածահար անելով կառույցի աշխատանքը` նրանք պահանջել էին, որ քաղաքապետ Սամվել Բալասանյանը միանա իրենց, այլապես ժողովուրդը կպահանջի քաղաքապետի հրաժարականը:
Բալասանյանը 5 րոպե ժամանակ էր խնդրել մտածելու համար, հետո մերժել էր ցուցարարների պահանջը։
Նշենք, որ ցուցարարները վաղ առավոտից քայլերթի էին դուրս եկել, բողոքի ցույցեր էին անցկացրել Շիրակի մարզպետարանի, մարզի դատախազության, ՀՀԿ գրասենյակի մոտ։
