ԵՐԵՎԱՆ, 2 մայիսի — Sputnik. Մի խումբ փաստաբաններ այսօր առավոտից միացել են բողոքի ակցիաներին և գործադուլ են հայտարարել։ Նրանք բողոքի ցույց են անցկացնում ՀՀ Վճռաբեկ դատարանի շենքի դիմաց։ Փաստաբան Նիկոլայ Բաղդասարյանը Sputnik Արմենիայի հետ զրույցում հայտնեց, որ իրենց պահանջները երկուսն են։
«Մեր այս ակցիայով ուզում ենք արձանագրել, որ Հայաստանի դատական համակարգը փաստացի չի գործում։ Համակարգի աշխատանքը պարալիզացված է, և դրա հիմնական մեղավորը Հանրապետական իշխանությունն է։ Մենք պահանջում ենք, որ ՀՀԿ-ն հեռանա։ Մեր հաջորդ պահանջը ՀՀ Վճռաբեկ դատարանի նախագահ Արման Մկրտումյանի հրաժարականն է, քանի որ դատական համակարգում այսօր տիրող իրավիճակի հիմնական մեղավորը նա է»,- ասաց Բաղդասարյանը։
Փաստաբաններն այս պահին էլ շարունակում են հավաքված մնալ Վճռաբեկ դատարանի շենքի մոտ` «Արման, հեռացիր» գրությամբ պաստառներով։
ՀՀ փաստաբանների պալատի նախագահ Արա Զոհրաբյանը ևս հանդես է եկել հայտարարությամբ և պահանջում է դատական նիստերին փաստաբանների բացակայությունները համարել հարգելի` հաշվի առնելով, որ բազմաթիվ փաստաբաններ մասնակցում են ժողովրդական բողոքի ակցիաներին, ինչպես նաև տեղաշարժման խոչընդոտներ կան։
