ԵՐԵՎԱՆ, 7 մայիսի — Sputnik. 2017-2018 թվականների ընթացքում ՀՀ արդարադատության նախարարությունը մշակել է 200-ից ավելի նորմատիվ իրավական ակտերի նախագծեր, բարեփոխել քրեակատարողական ոլորտում առկա վիճակը։ Այս մասին ասված է նախարարության հրապարակած տարեկան հաշվետվության մեջ։
Ըստ այդմ, իրավական ակտերով հստակեցվել են հացադուլ իրականացնող դատապարտյալների ու կալանավորների պահման պայմանների առանձնահատկությունները։ Փոփոխություններ են կատարվել պատժի կրման հետ անհամատեղելի հիվանդությունների ցանկում, չափորոշիչները համապատասխանեցվել են միջազգային կարգին։
Նախարարությունը հայտնում է նաև, որ 2018թ-ից սկսած` օտարերկրյա քաղաքացի կալանավորներին ու դատապարտյալներին տրամադրվել է տեսազանգի հնարավորություն: Այդ նպատակով ՀՀ ԱՆ «Վարդաշեն» և «Նուբարաշեն» քրեակատարողական հիմնարկներում տեղադրվել են տեսազանգի ապահովման տեխնիկական միջոցներ։
«Քրեակատարողական ծառայության գործունեության արդյունավետության բարձրացման նպատակով՝քրեակատարողական հիմնարկներում իրականացվող էներգախնայողության ծրագրի շրջանակներում քրեակատարողական բոլոր հիմնարկներն ապահովվել են անհրաժեշտ ջերմային և հիգիենիկ պայմաններով»,- ասված է Արդարադատության նախարարության պաշտոնական հաղորդագրության մեջ։
Հստակեցվել է նաև ՔԿՀ ծառայողին զենք և ռազմամթերք հատկացնելու, պահելու, կրելու և հանձնելու կարգը։ Իսկ 2018թ.-ից քրեակատարողական ծառայության կրտսեր ծառայողների աշխատավարձը 157 939 դրամից դարձել է 163 578 դրամ:
«Քրեակատարողական օրենսգրքում փոփոխություն կատարելու մասին» ՀՀ օրենքի նախագծով առաջարկվում է առանձնապես ծանր հանցագործության համար որոշակի ժամկետով կամ ցմահ ազատազրկման դատապարտված անձանց նախատեսվում է տրամադրել տարվա ընթացքում առնվազն վեց կարճատև և երկու երկարատև տեսակցություն:
Մայիսի 3-ին կայացած կառավարության նիստում Կարեն Կարապետյանը հայտարարեց, որ այդ կազմով վերջին նիստն է գումարվում։ Ավելի ուշ վարչապետի պաշտոնակատարն իր ֆեյսբուքյան էջում հրապարակեց անցած 19 ամիսների հաշվետվության տվյալները։ Կարապետյանի օրինակով, բոլոր գերատեսչությունները ևս հանդես են գալիս հաշվետվություններով։
