ԵՐԵՎԱՆ, 7 մայիսի — Sputnik. 2017թ.-ին Հայաստանում աճել է ավտոմոբիլային տրանսպորտով բեռնափոխադրումների ծավալը` արտահանումը` 23, ներկրումը` 37,8%-ով։ 2018թ. առաջին եռամսյակում, նախորդ տարվա նույն ժամանակահատվածի համեմատ ավտոմոբիլային տրանսպորտով բեռնափոխադրումների ծավալն աճել է 24.0%-ով, արտահանումը` 13.7, ներկրումը` 44,8%-ով։ Ամփոփելով 2017-18թթ-ի ցուցանիշները` հայտնում է ՀՀ տրանսպորտի, կապի և տեղեկատվական տեխնոլոգիաների նախարարությունը։
2017թ.-ին ավտոմոբիլային տրանսպորտով փոխադրվել է 175 միլիոն 733 հազար ուղևոր, որից տաքսիներով՝ 7 միլիոն 692 հազար, երկաթուղային տրանսպորտով՝ 367 հազար։
2016թ.-ի դրությամբ Հայաստանի 220 համայնք դուրս էր մնացել տրանսպորտային երթուղիներից։ Դրանց կեսից ավելին արդեն ներառվել է գործող երթուղային ցանցում:
«Այսօր ունենք չսպասարկվող շուրջ 90 համայնք»,- ասված է հաղորդագրության մեջ։
2008-2017թթ. ընթացքում «Հարավկովկասյան երկաթուղին» 5 տոկոսով գերակատարել է ներդրումային ծրագրով նախատեսված պարտավորությունները` ներդնելով 110 068 մլրդ դրամ։
2017թ. Հայաստանի Հանրապետություն է ներկրվել ռուսական արտադրության նոր էլեկտրագնացքը։ Բանակցություններ են տարվում նմանատիպ երկրորդ էլեկտրագնացքը ձեռք բերելու և շարժակազմը թարմացնելու ուղղությամբ:
Հեռահաղորդակցության ոլորտում ևս, եթե վերջին 3 տարիների ընթացքում ամբողջ աշխարհում անկում է գրանցվել, ապա Հայաստանում 2017թ-ի առաջին կիսամյակի համեմատ 2018թ-ի առաջին եռամսյակում գրանցվել է 2.5 % աճ:
ՏՏ ընկերությունների արտահանման ծավալներն 2017թ-ին կազմել են 57,8 մլրդ դրամ՝ 2016 թվականի համեմատ աճելով 27.1%-ով։ Արտահանումների 36,4%-ը կատարվել է դեպի ԱՄՆ և Կանադա, 28,4%-ը` Եվրոպա, 15,4%-ը` Ռուսաստան և ԱՊՀ երկրներ:
