ԵՐԵՎԱՆ, 9 մայիսի — Sputnik. ՀՀ վարչապետ Նիկոլ Փաշինյանը Ստեփանակերտում այցելել է արցախյան ազատամարտում զոհվածների շիրիմներին, հանդիպել այցի եկած հարազատներին, նրանց հետ կիսել վիշտն ու հարգել հայրենիքի համար նահատակված ազատամարտիկների հիշատակը։
Արցախի մայրաքաղաքից հայտնում է Sputnik Արմենիայի թղթակիցը։
Ստեփանակերտի գերեզմանատանը Նիկոլ Փաշինյանը չի մերժել ազատամարտիկի թոռան հետ լուսանկարվելու խնդրանքը, իսկ լուսանկարվելուց հետո գրկել ու ոգևորել է հուզված երեխային։ Նիկոլ Փաշինյանը մոտեցել է նաև որդու հուշաքարի առաջ կանգնած սևազգեստ կնոջն ու նրա հետ մեկ րոպե լռությամբ հարգել ազատամարտիկի հիշատակը։
Մինչ այդ Փաշինյանն ու Արցախի Հանրապետության ղեկավարները ոտքով շրջել են Ստեփանակերտի փողոցներով ու Վերածննդի հրապարակով, ծաղկեպսակ դրել արցախյան հերոսամարտի մասնակիցների եղբայրական գերեզմանին։
Ամբողջ ճանապարհին Նիկոլ Փաշինյանին ողջունել ու վարչապետ ընտրվելու առիթով շնորհավորել է Արցախի ժողովուրդը։
Փաշինյանին ուղեկցել են Արցախի նախագահ Բակո Սահակյանը, Պաշտպանության նախարար, պաշտպանության բանակի հրամանատար Լևոն Մնացականյանը, ՀՀ ԶՈՒ գլխավոր շտաբի պետ, գեներալ-գնդապետ Մովսես Հակոբյանը, ՀՀ ԱԺ «Ելք» խմբակցության պատգամավորներ Արամ Սարգսյանը, Արտակ Զեյնալյանը, Սասուն Միքայելյանը, Արցախի թեմի առաջնորդ Պարգև արքեպիսկոպոս Մարտիրոսյանը։
ՀՀ վարչապետի արցախյան այցի օրակարգում նախատեսվում է նաև այց Շուշի։ Ավարտին Փաշինյանը կհանդիպի լրագրողների հետ։
