Միրիամ Բաղդասարյանը կանադական «Ձայնի» եզրափակիչ փուլում երկրորդ տեղը գրավեց։ Նա հանդես էր գալիս Լարա Ֆաբիանի թիմում։ Ինչպես հայտնում է TVA կանադական հեռուստաընկերությունը, մրցույթում հաղթել է Գառուի թիմի երգչուհին` ստանալով հանդիսատեսի ձայների 60 տոկոսը, իսկ Միրիամը ձայների 20 տոկոսին էր արժանացել։
Միրիամը ծնվել է Կանադայում և երկար ժամանակ ապրել Հայաստանում։ Մի քանի տարի առաջ վերադարձել է Կանադա։
«Ես պարզապես ուզում եմ ցույց տալ ունակություններս։ Ինձ համար սա բոլորովին էլ մրցույթ չէ, որովհետև ես չեմ ուզում հաղթել որևէ մեկին։ Պարզապես ուզում եմ, որ մարդանց դուր գա այն, ինչ անում եմ ես։ Իսկ ինչպես ասում էր Լարա Ֆաբիանը, բառերը հնարավոր չէ հենց այնպես երգել։ Դրանք պետք է սրտիցդ դուրս գան»,- ասում է նա։
Միրիամն այս կիրակի դարձավ 19 տարեկան։ Արդեն երրորդ տարին է` նա տարեդարձը նշում է Հայաստանից դուրս։ Բայց այս տարի նա լավագույն նվերն է ստացել և ծննդյան օրը բեմ է բարձրացել։
«Միրիամը հիասքանչ է։ Նա ինքն էլ չգիտի, թե որքան տաղանդավոր է։ Նրա համար սա ուղակի զվարճանք է։ Եզրափակիչի համար ես երգ եմ գրել, որը լիովին փոխանցում է նրա էներգետիկան»,- ասում է հայտնի երգչուհին։
Հաղթանակից առավել կարևոր էր այն, որ Միրիամն այս մրցույթի շնորհիվ սովորեց հաղթահարել խոչընդոտները, գնահատել ընկերությունն ու լավացնել ֆրանսերենի գիտելիքները։
