ԵՐԵՎԱՆ, 11 մայիսի – Sputnik. Հայաստանում բոլորը հավասար են օրենքի առաջ, այդ թվում` ոստիկանապետը։ Այս մասին լրագրողներին կառավարության նիստից առաջ ասաց Հայաստանի ոստիկանության նոր ղեկավար Վալերի Օսիպյանը։
«Ժողովրդական շարժման ժամանակ մենք ականատես ենք դարձել, թե ինչ է տեղի ունեցել մեր երկրում։ Ես ցանկանում եմ կրկին ցույց տալ մեր հայրենակիցներին, որ ոստիկանությունը միշտ եղել է ժողովրդի կողքին, և եթե ինչ-որ մեկն այդ առումով կասկածներ ունի, ապա վաղը, մյուս օրը դուք դրանում կհամոզվեք։ Մենք միշտ ժողովրդի կողքին ենք», – հայտարարեց նա։
Այն հարցին, թե նա ինչո՞ւ է ուժ կիրառել ցուցարարների նկատմամբ, Օսիպյանը պատասխանեց. «Գիտեք, ես եղել եմ իրավապահ համակարգի առաջնագծում։ Ով էլ լիներ իմ փոխարեն, նույնկերպ կաշխատեր։ Վարչապետը պահանջ է դրել մեր առաջ, մենք կկատարենք այն և կկանգնենք ժողովրդի կողքին»։
Կկարողանա՞ նա արդյոք, եթե հարկ լինի, ձերբակալել իր նախկին ղեկավարներին` Հայաստանի ոստիկանության պետ Վլադիմիր Գասպարյանին և Երևանի ոստիկանապետ Լևոն Երանոսյանին, Օսիպյանը պատասխանեց.
«Բոլորը հավասար են օրենքի առաջ։ Իսկ եթե ինչ-որ մեկն ապացուցի, որ գնդապետ Օսիպյանը ոչ համարժեք ուժ է կիրառել քաղաքացիների նկատմամբ, ապա ես ինքս հրաժարական կտամ և պատասխան կտամ օրենքի առաջ։
Մեր երկրում կոռուպցիայի տարրեր կան։ Պետք է արմատախիլ անել դրանք։ Շուտով կտեսնեք, թե մենք ինչ կանենք դրա իրականացման համար», – հայտարարեց նա։
ՀՀ ոստիկանապետի պաշտոնում Վալերի Օսիպյանը նշանակվել է մայիսի 10–ին` վարչապետ Նիկոլ Փաշինյանի առաջարկությամբ։ Երկար տարիներ Օսիպյանը եղել է Երևանի փոխոստիկանապետը և ղեկավարել իրավապահ մարմինների աշխատանքը վերջին տարիների զանգվածային ցույցերի ժամանակ։
