ԵՐԵՎԱՆ, 23 մայիսի — Sputnik. ՀՀ կառավարությունը փորձելու է ավելացնել Հայաստան-ԵՄ համաձայնագրով նախատեսված ֆինանսական աջակցության ծավալները։ Այսօր Ազգային ժողովում կառավարության հետ հարցուպատասխանի ընթացքում, պատասխանելով պատգամավորների հարցերին, ասաց վարչապետ Նիկոլ Փաշինյանը։
«Միջազգային հանրության ներկայացուցիչները մեզ հետ քննարկումների ընթացքում ֆինանսական լայն աջակցություն ցույց տալու պատրաստակամություն են ցուցաբերում: Մենք շատ ուրախ ենք այդ պատրաստակամության համար և պիտի քննարկենք այդ աջակցությունը հնարավորինս արդյունավետ օգտագործելու գործնական խնդիրները»,- ասաց նա` հավելելով, որ այդ հարցը մշտապես լինելու է կառավարության ուշադրության կենտրոնում:
Փաշինյանը նաև նշեց, որ չի կարծում, թե պետք է շարունակել «դրսի ձեռքին նայելու» գործելաոճը։
«Հայաստանում էլ կան ռեսուրսներ, դրանց մի մասը ստվերում է, գուցե օֆշորային գոտիներում էլ կան ռեսուրսներ, հայ ժողովրդի շրջանում նույնպես կան ռեսուրսներ: Այս իմաստով Հայաստանի կարգավիճակի որոշակի փոփոխություն պետք է արձանագրենք: Մենք պետք է կարողանանք ընտրել, թե ինչ աջակցություն է մեզ պետք և ինչ չափով: Մենք ունենք այդ ընտրությունը և այդ ընտրության մեջ կլինենք մաքսիմալ արժանապատիվ, և որևէ ընտրություն չի կատարվի Հայաստանի ինքնիշխանության և արժանապատվության հաշվին»,- ասաց Փաշինյանը:
ԵՄ-ի հետ համաձայնագրի անցումային որոշ դրույթներ ուժի մեջ են մտնում հունիսի 1-ից։ Համաձայնագրով նախատեսվում է մինչև 2020թ-ը Հայաստանին տրամադրել 160 միլիոն եվրոյի ֆինանսական աջակցություն։
