ԵՐԵՎԱՆ, 25 մայիսի — Sputnik. Այսօր դպրոցն ավարտում ու չափահաս կյանք է մտնում 21-րդ դարի առաջին սերունդը` 2000թ–ին ծնված 18-ամյա պատանիները։ Միաժամանակ այս տարվա շրջանավարտները 12-ամյա լիարժեք կրթություն ստացած առաջին սերունդն են։ Այս մասին Sputnik Արմենիայի հետ զրույցում հիշեցրեց կրթության ոլորտի փորձագետ Սերոբ Խաչատրյանը։
«Շնորհավորում եմ, որ խիզախորեն 12 տարի գնացին դպրոց։ Այսօրվա կյանքը շատ հետաքրքիր է։ Պատկերավոր համեմատություն անեմ, թե իրենք ինչ հնարավորություններ ունեն. առաջվա կյանքը շատ նման էր գետի` նեղ էր, մի հոսանք կար, որ քեզ տանում էր ու դու շատ հնարավորություններ չունեիր։ Այսօրվա կյանքը մեծ ծով է, որտեղ դու կանգնած ես ափի մոտ ու ինքդ պիտի որոշես` որքան ու որ ուղղությամբ գնաս»,–ասաց նա։
Սերոբ Խաչատրյանն այս աննախադեպ հնարավորությունների շրջանում ծնված սերնդին բախտավոր սերունդ է համարում։ Հայաստանում կա աղքատության բարձր մակարդակ, սոցիալական խնդիրներ, բայց դրանց զուգահեռ կան հնարավորություններ, որոնցից օգտվելով ու գիտելիքներ ձեռք բերելով, կարելի է կյանքն ավելի բովանդակալից դարձնել, համոզված է փորձագետը։
Միաժամանակ, նոր սերնդի ամենալուրջ մարտահրավերները` հնարավորությունների դարում, ժամանակը վատնելու արատավոր սովորույթներն են, որոնք ևս ժամանակակից կյանքում անսպառ են։ Ուստի, Սերոբ Խաչատուրյանը նոր կյանք մտնող երիտասարդներին խորհուրդ է տալիս չշեղվել ճիշտ ուղուց, խնայել ճանապարհն ու «լողալ» ուղիղ դեպի նպատակների իրականացումը։
