ԵՐԵՎԱՆ, 2 հունիսի — Sputnik. Ֆրանսիահայ երգիչ Շառլ Ազնավուրը ՀՀ վարչապետ Նիկոլ Փաշինյանին շնորհավորական նամակ է հղել ծննդյան տոնի և վարչապետի պաշտոնում ընտրվելու կապակցությամբ։
«Համոզված եմ, որ դուք կկատարեք ձեր առաքելությունը և հանդես կգաք մեր ժողովրդի շահերից»,-գրել է նա:
Ազնավուրը նշել է, որ մեծ հուզմունքով ու հպարտությամբ է հետևել Հայաստանում տեղի ունեցող իրադարձություններին։
«Չնայած բոլոր խոչընդոտներին` երկրի իրավիճակը բարեբախտաբար փոխվել է: Ձեր շնորհիվ այսօր Հայաստանում նոր հույս կա հայ ժողովրդի համար, այն ժողովրդի, որ հավատացել և կանգնած է եղել Ձեր կողքին»,- նշել է աշխարհահռչակ երգիչը։
Ազնավուրն ընդգծել է` ամբողջ սրտով ցանկանում է, որ Հայաստանի երիտասարդները կարողանան համախմբել իրենց ուժերը, բոլոր նոր մտահղացումներն ու նոր ծրագրերը կարողանան իրականացնել Նոր Հայաստանում։
Նամակի վերջում նա նշել է, որ շատ կցանկանար գալ այս Նոր Հայաստան և հանդիպել մեր ժողովրդի ապագան կերտող ուժերին:
