ԵՐԵՎԱՆ, 3 հունիսի- Sputnik. Այսօր՝ հունիսի 3-ին, ժամը 00:50-ի սահմաններում Հրազդան քաղաքի Միկրոշրջան թաղամասի բնակիչ 32-ամյա Նվեր Ալեքսանդրյանը Հրազդան քաղաքի Զորավար Անդրանիկի պողոտայում իր վարած BMW մակնիշի 35 RN 561 համարանիշի ավտոմեքենայով դուրս է եկել ճանապարհի երթևեկելի գոտուց և բախվել էլեկտրասյանը:
Այս մասին տեղեկացնում է Shamshyan.com-ը:
Բախման հետևանքով էլեկտրասյունը տապալվել է, ավտոմեքենայի ուղևոր, Հրազդան քաղաքի Միկրոշրջան թաղամասի բնակիչ 30-ամյա Գոռ Հովհաննիսյանը տեղում մահացել է, իսկ Ն. Ալեքսանդրյանը մարմնական վնասվածքներով տեղափոխվել է Հրազդանի բժշկական կենտրոն:
Փրկարարները մահացածի դին դուրս են բերել ավտոմեքենայից, հետո հոսանքազրկել են ավտոմեքենան, փակել գազաբալոնը, սահմանազատել տարածքը:
Փաստի առթիվ հարուցվել է քրեական գործ ՀՀ Քր-օրի 242 հոդվածի 2-րդ մասի հատկանիշներով:
