Հայաստանի հարկային և մաքսային ծառայության պետի տեղակալին կհարցաքննեն ԱԱԾ–ում

ԵՐԵՎԱՆ, 4 հունիսի –Sputnik. Հայաստանի պետեկամուտների կոմիտեի պետի տեղակալ Ռաֆիկ Մաշադյանին կհարցաքննեն ԱԱԾ–ում։ Այս մասին լրագրողներին ԱԺ–ում ասաց ԱԱԾ տնօրեն Արթուր Վանեցյանը։

Հարցաքննությունն իրականացվելու սուպերմարկետների գործով, հարցաքննման արդյունքներից կախված կլինի այդ գործում Մաշադյանի հետագա կարգավիճակը, հայտնեց Վանեցյանը։

Այն հարցին, թե ինչպես կարելի է կասկածել նման լուրջ պաշտոնին նոր նշանակած չինովնիկին, Վանեցյանը պատասխանեց. «Դա դեռ անձեռնմխելիություն չի նշանակում»։

Նախորդ կառավարությունում Մաշադյանը երկար տարիներ Պետեկամուտների կոմիտեում ղեկավարում էր խոշոր հարկատուների վարչությունը։

Ավելի վաղ ԱԱԾ–ն խուզարկություն էր իրականացրել հանրապետության սուպերմարկետներում և հայտարարել էր հարկերից խուսափելու մեխանիզմի բացահայտման մասին։ Սուպերմարկետները միրգ ու բանջարեղեն էին վաճառում` չվճարելով ԱԱՀ և եկամտահարկ։ Այդ նպատակով նրանք կեղծ Ա/Ձ–ներ էին գրանցել։

Վանեցյանը համաձայն չէ նրա հետ, որ սուպերմարկետները դա ստիպված են արել, որպեսզի կորուստով չաշխատեն։ «Այդպես վարվում էին ձեռնարկություններից միայն 11–ը։ Այդ դեպքում ինչո՞ւ նման բան չէին անում մյուսները։ Մի՞թե նրանք չէին ուզում ավելի շատ գումար աշխատել։ Բայց չէ՞ որ նրանք այդպես չէին վարվում», – առարկեց նա։

Հարցին, թե արդյոք այդ սխեմայի մասին գիտեին նախկին իշխանությունները և աչք էին փակում դրա վրա, Վանեցյանը պատասխանեց, որ ենթադրություններ անել չի կարող։