ԵՐԵՎԱՆ, 7 հունիսի — Sputnik. Խորհրդարանն ընդունեց կառավարության` ներկա իրողություններին ադեկվատ ծրագիրը, հինգշաբթի Sputnik Արմենիային ասաց քաղաքական տեխնոլոգ Վիգեն Հակոբյանը։ Նրա խոսքով` Հայաստանի կառավարության ծրագիրը ինչ–որ առումով առարկայական չէ, դրանում քիչ են կոնկրետ ցուցանիշները, առաջին հերթին այն պատճառով, որ կառավարությունն անցումային է։
Ներկա քաղաքական իրավիճակում այլ բան ակնկալել պետք չէր։ Հաշվի առնելով այն, որ ծրագրում ամրագրված է մեկ տարվա ընթացքում արտահերթ ընտրություններ անցկացնելու անհրաժեշտությունը, հասկանալի է դառնում, որ փաստաթուղթը նախատեսված է այդ ժամկետի համար։
«Անիմաստ էր ինչ–որ նշաձող սահմանել, հակառակ դեպքում ներկայացված թվերը լուրջ չէին ընդունվի», – հավելեց փորձագետը։
Նշենք, որ ի սկզբանե Փաշինյանը և իր կողմնակիցները հայտարարել էին, որ ԱԺ արտահերթ ընտրությունները տեղի կունենան մինչև տարեվերջ։ Հիմա ծրագրում այդ ժամկետը երկարացվել է մինչև մեկ տարի։
Հակոբյանը սա պայմանավորում է առաջին հերթին ընտրական օրենսդրության շտկումների անհրաժեշտությամբ, ինչը որոշակի ժամանակ է պահանջում։ Պետք է ոչ միայն փոփոխություններ անել, այլ նաև համաձայնեցնել դրանք համապատասխան միջազգային կառույցների հետ։
Հակոբյանի կարծիքով` ընտրական բարեփոխումներից բացի Փաշինյանի գլխավորած քաղաքական ուժն ընտրություններին նախապատրաստվելու կարիք ունի։ Համենայն դեպս «Ելք» դաշինքը, մինչ «թավշյա հեղափոխությունը», լիովին ներկայացված չի եղել Հայաստանի մարզերում։ Պետք է լուծել տեխնիկական հարցեր` բացել մարզային ներկայացուցչություններ, տեղում կարգավորել աշխատանքը և այլն։
«Փաշինյանի և նրա թիմի չշտապելն ու հանգստությունը, ինչ–որ առումով պայմանավորված են Հանրապետական կուսակցությունից խոշոր բիզնեսի «փախուստով»։ Այսօրվա միտումները բավական հուսալի են վարչապետի համար», – ասաց նա։
Միաժամանակ պետք է հաշվի առնել, որ «տարվա ընթացքում» ձևակերպումը մանևրելու հնարավորություն է տալիս. ընտրությունները կարող են անցկացվել 3 ամսից կամ 7 ամսից` կախված իրադրությունից և քաղաքական պահից։ Հենց գործադիր իշխանությունը զգա իր համար բացասական միտումները և ազդանշանները` կկազմակերպի արտահերթ ընտրություններ։
Հայաստանի ԱԺ-ն հունիսի 7–ին հաստատեց Նիկոլ Փաշինյանի ղեկավարած կառավարության ներկայացրած գործունեության ծրագիրը: Այն հաստատվեց ՝ 62 կողմ, 39 դեմ ձայներով: Կառավարության ծրագրի ընդունումով, փաստորեն, սպառվեց ԱԺ-ն ցրելու և արտահերթ խորհրդարանական ընտրություններ անցկացնելու սահմանադրական դրույթը:
Կառավարության ծրագիրը բաղկացած է 7 կետից` Կառավարության գործունեության հիմնական ուղենիշներ, արտահերթ խորհրդարանական ընտրությունների նախապատրաստում, արտաքին և ներքին անվտանգության ապահովում, պայքար կոռուպցիայի դեմ, ազատ, արժանապատիվ և երջանիկ քաղաքացի, տնտեսության շարունակական զարգացում և Հայաստան-Սփյուռք կապեր։
