ԵՐԵՎԱՆ, 7 հունիսի — Sputnik. Հատուկ քննչական ծառայությունը հայտնում է, որ այսօր «Ժամանակ» օրաթերթում հրապարակված այն տեղեկությունը, թե «վերջերս հարցաքննվել է Մարտի 1-ի իրադարձությունների ժամանակ ներքին զորքերի հրամանատար Գրիգոր Գրիգորյանը», իրականությանը չի համապատասխանում:
««Ժամանակ» օրաթերթին հորդորում ենք զերծ մնալ չստուգված, իրականությանը չհամապատասխանող տեղեկություններ հրապարակելուց և այդ կերպ ապատեղեկատվություն տարածելուց»,- նշված է հայտարարության մեջ:
Թերթի այսօրվա համարում հրապարակված հոդվածում նշվել էր նաև, որ ըստ Գրիգորյանի` 2008 թվականի մարտյան իրադարձությունների ժամանակ Ռոբերտ Քոչարյանը մանրամասն հրահանգավորել է, որ ցուցարարների վրա դիմահար կրակ բացվի և կիրառվեն նման դեպքերի համար արգելված հատուկ միջոցներ:
Ըստ թերթի` Գրիգորյանը տեղեկացրել է, որ ինքն իր անձնական ապահովության համար ձայնագրել է իր և Քոչարյանի միջև տեղի ունեցած հեռախոսազրույցը, և այն կարող է ներկայացնել որպես իր ասածների հիմնավորում:
Քոչարյանի գրասենյակն արդեն արձագանքել է այս հրապարակմանը` նշելով, որ սա բացարձակ հերյուրանք է։
