ԵՐԵՎԱՆ, 15 հունիսի — Sputnik. ՀՀ Վճռաբեկ դատարանը քիչ առաջ բեկանեց ԼՂՀ ՊԲ նախկին հրամանատար, Արցախի հերոս Սամվել Բաբայանի գործով դատավճիռը։ Բաբայանը, այս գործով մյուս մեղադրյալներ Սանասար Գաբրիելյանն ու Արմեն Պողոսյանն ազատ կարձակվեն: Նրանց նկատմամբ կիրառվեց պատգամավորների անձնական երաշխավորությունը:
Դատարանը գործն ուղարկեց նոր քննության: Վճռաբեկ դատարանը փոխեց առաջին ատյանի դատարանի կողմից 6 տարի ազատազրկման դատապարտված Սամվել Բաբայանի խափանման միջոց կալանավորումը։
Որոշման համար հիմք ընդունեց ԱԺ 11 պատգամավորի անձնական երաշխավորությունները։ Սամվել Բաբայանին ազատ արձակելու որոշումը կիրագործվի, երբ դատարան ներկայացվի 11 պատգամավորից յուրաքանչյուրի կողմից 500 հազարական դրամ գրավի անդորրագրերը։
Անդորրագրերը ներկայացնելուց հետո Բաբայանն ազատ կարձակվի Ազգային անվտանգության ծառայության մեկուսարանից։
Նշենք, որ ԱԺ պատգամավորները երաշխավորել էին, որ մեղադրյալներ Սամվել Բաբայանը և Սանասար Գաբրիելյանը, գտնվելով ազատության մեջ, կդրսևորեն պատշաճ վարքագիծ, չեն խուսափի իրենց դատավարական պարտականությունները պատշաճ կատարելուց` քրեական վարույթն իրականացնող մարմնի կանչով ներկայանալուց։
Հայտարարության տակ ստորագրել են պատգամավորներ Նաիրա Զոհրաբյանը, Արամ Սարգսյանը, Վահան Կարապետյանը, Հրանտ Մադաթյանը, Սերգեյ Բագրատյանը, Արայիկ Աղաբաբյանը, Արարատ Զուրաբյանը, Վարդան Բոստանջյանը, Վահե Էնֆիաջյանը, Տիգրան Ստեփանյանը, Իվետա Տոնոյանը։
ԱԱԾ-ն Սամվել Բաբայանին ձերբակալել է 2017 թ-ին` «Իգլա» տեսակի զենիթահրթիռային համալիր մաքսանենգ ճանապարհով Հայաստան բերելու գործի շրջանակում:
Բաբայանը չի ընդունում իրեն առաջադրված մեղադրանքը, ըստ որի՝ նա նախնական համաձայնությամբ դրդել է մի խումբ անձանց ապօրինի կերպով ձեռք բերել «Իգլա» տեսակի դյուրակիր զենիթահրթիռային համալիր և այն փոխադրել Հայաստան:
«Իգլայի» գործով կալանավորված Սանասար Գաբրիելյանը կոչումով փոխգնդապետ է, ավելի քան տասը տարի ծառայել է Հայաստանի զինված ուժերում։
