ԵՐԵՎԱՆ, 15 հունիսի — Sputnik. Կառավարության այն անդամները, որոնք պաշտոն են ստացել ոչ իրենց մշտական բնակության վայրում, բնակարան վարձակալելու համար փոխհատուցում կստանան։ Կառավարությունն այսօրվա նիստում համապատասխան որոշում ընդունեց։
«Իր մշտական բնակության վայրից դուրս պաշտոնի նշանակված կառավարության անդամին տվյալ վայրում բնակարանի վարձին համարժեք փոխհատուցման առավելագույն չափ սահմանել՝ ամսական 100 000 (հարյուր հազար) ՀՀ դրամ»,- նշված է որոշման մեջ:
Կառավարության անդամի բնակարանի վարձի փոխհատուցումը տրամադրվում է իր մշտական բնակության վայրից դուրս կառավարության անդամի պաշտոնավարման ժամանակահատվածի համար:
Փոխհատուցումը տրամադրվում է Կառավարության անդամի ` վարչապետին ուղղված դիմումի հիման վրա, որին կցվում են անշարժ գույքի վարձակալության պայմանագրի, վարձակալության իրավունքի պետական գրանցման վկայականի պատճենները, դիմումի մեջ ներառվում է նաև տվյալ վայրում կառավարության անդամին սեփականության իրավունքով պատկանող բնակելի անշարժ գույքի բացակայության վերաբերյալ կառավարության անդամի հայտարարությունը:
Նշենք, որ Հայաստանում նախարարների աշխատավարձը 792 հազար դրամ է, հարկերը հաշվարկելուց հետո նրանք ստանում են 578 հազար դրամ։
