ԵՐԵՎԱՆ, 15 հունիսի — Sputnik. ՀՀ վարչապետի և Ադրբեջանի նախագահի հանդիպումը բանակցությունների ձևաչափում չէր, ասել է Ռուսաստանի արտգործնախարարի պաշտոնական ներկայացուցիչ Մարիա Զախարովան` մեկնաբանելով Նիկոլ Փաշինյանի և Իլհամ Ալիևի ծանոթությունը Մոսկվայում։
Ավելի վաղ Հայաստանի կառավարության ղեկավարը Facebook սոցցանցի ուղիղ եթերում հայտնել էր, որ Մոսկվայում Ռուսաստանի նախագահ Վլադիմիր Պուտինը ծանոթացրել է նրան Ադրբեջանի նախագահ Իլհամ Ալիևի հետ։
«Կարծում եմ` պետք չէ շփոթել ձևաչափերը, գոյություն ունի երկրների ղեկավարների միջև շփում, որը ենթադրում է նաև բազմակողմ և երկկողմ շփում։ Եվ կա խնդիր, որը կարգավորման իր ձևաչափն ունի», — ասել է Զախարովան։
Նրա խոսքով` բարենպաստ մթնոլորտ ստեղծելը, իհարկե, միայն նպաստում է բանակցային գործընթացի առաջխաղացմանը։
«Ոչ միայն նպաստում է, այլև կարևորագույն երաշխիքն է այն խնդրի լուծման համար, որի մասին դուք ասացիք։ Սակայն ուզում եմ ևս մեկ անգամ նշել, որ դրանք տարբեր ձևաչափեր են», — նշել է Զախարովան։
Փաշինյանն ասել էր նաև, որ սա «ծանոթացման արարողակարգի» նման մի բան էր, որևէ շփում, զրույց կամ քննարկում չի եղել։
Նիկոլ Փաշինյանը Մոսկվա էր մեկնել երկօրյա այցով` մասնակցելու 2018 թվականի Աշխարհի առաջնության բացմանը։
