ԵՐԵՎԱՆ, 16 հունիսի — Sputnik. Հայաստանի առողջապահության նախարարությունն այսօր վերջնականապես կհայտնի, թե որքանով է վտանգավոր կենդանաբանական այգի այցելելը, և կարո՞ղ է արդյոք այգի այցելելը տուբերկուլյուզով հիվանդանալու պատճառ դառնալ։ Այս մասին լրագրողների հետ զրույցում ասաց Հայաստանի առողջապահության նախարար Արսեն Թորոսյանը։
«Այսօր հայտարարություն կլինի։ Ես չեմ փակում ու բացում կենդանաբանական այգին։ Մենք պետք է կրկին ամեն ինչ ստուգենք և արդեն վերջնական հայտարարություն անենք», — ասաց նախարարը։
Հիշեցնենք, որ Երևանի կենդանաբանական այգում ձմռանը սատկել են մի քանի կենդանիներ, այդ շրջանում այնտեղ այցելուներ չեն եղել։ Այգու աշխատակիցների հայտարարությամբ՝ այսօր այգի այցելելը վտանգավոր չէ, քանի որ հիվանդ կենդանիներ չկան, իսկ սատկածների փոխարեն բերվում են նորերը։
Կենդանիների անկման պատճառը եղել է տուբերկուլյոզը։ Հիվանդության առաջին զոհը դարձել է քարայծը, այնուհետև սատկել են լամաները, կամերունյան այծը և եղջերուները։
