ԵՐԵՎԱՆ, 19 հունիսի — Sputnik. Հայաստանում չկա Հանրապետական և այլ կուսակցություններ։ Այսօր ԱԺ-ում, Մանվել Գրիգորյանի նկատմամբ քրեական հետապնդում սկսելու հարցի քվեարկության ժամանակ, լրագրողների հետ զրույցում ասաց ԱԺ ՀՀԿ խմբակցության պատգամավոր, ՀՀԿ փոխնախագահ Գալուստ Սահակյանը։
«Ես երբևիցե որևէ մեկի շրջապատում չեմ եղել։ Բայց Մանվելին էլ եմ ճանաչում, բոլոր պատգամավորներին էլ եմ ճանաչում»,- Մանվել Գրիգորյանի մտերիմ շրջապատի` նրա գործերին տեղյակ լինել-չլինելու հարցին ի պատասխան ասաց Սահակյանը։
Նա չհերքեց, սակայն, որ ներկա է եղել Մանվել Գրիգորյանի կազմակերպած խնջույքներին, բայց ոչինչ չի տեսել։
«Ես հետաքննիչ մարմին չեմ, ես էլ եմ այդ հաղորդման տպավորության տակ»,- ասաց Սահակյանը` նշելով, որ դրանով է պայմանավորված նաև ՀՀԿ-ի այսօրվա դիրքորոշումը։
Սահակյանը հայտնեց նաև, որ Սերժ Սարգսյանի հետ քննարկվել է Մանվել Գրիգորյանի շուրջ առաջացած իրավիճակը, բայց հրաժարվեց հայտնել կուսակցության ղեկավարի կարծիքը` հայտնելով միայն, որ «ճիշտ բաներ է ասել»։
Հիշեցնենք` ԱԱԾ-ն հունիսի 17-ին տեսանյութ էր հրապարակել` ներկայացնելով ՀՀ Արմավիրի մարզի Արշալույս գյուղի Լճափնյա փողոցում գտնվող, Մանվել Գրիգորյանին սեփականության իրավունքով պատկանող հանգստյան գոտում, ինչպես նաև Էջմիածին քաղաքի Ալավերդյան փողոցի տուն 46 հասցեում տեղակայված և Գրիգորյանին պատկանող առանձնատան կատարված խուզարկության արդյունքները:
Տեսանյութում երևում է, որ Մանվել Գրիգորյանին պատկանող հանգստյան գոտին վերածվել էր զինապահեստի, ռետրո և ժամանակակից տասնյակ ավտոմեքենաների ավտոպարկի: Ակնալճի ամառանոցը գեներալի համար ծառայել է նաև «զինվորի բաժին» նշագրումով սննդի, հիգիենիկ պարագաների, դեղորայքի, զինվորական հանդերձանքի պահեստարանի: Զինվորներին հասցեագրված արկղերին կից նամակներից ակնհայտ էր, որ արկղերի պարունակությունը դեռևս 2016-ին ապրիլյան քառօրյա պատերազմի օրերին ուղարկված օգնությունն էր առաջնագծի զինվորներին: Զինվորական շապիկներ, գուլպաներ, դեղորայք, բինտեր, վիրակապեր դեղահաբեր…
Մանվել Գրիգորյանը ձերբակալված է։
ԱԺ-ն այսօր քննարկում է դատախազության միջնորդությունը Մանվել Գրիգորյանին պատգամավորական անձեռնմխելիությունից զրկելու և նրա նկատմամբ քրեական հետապնդում սկսելու մասին։
