ԵՐԵՎԱՆ, 27 հունիսի — Sputnik. Հայաստանում Ռուսաստանի դեսպան Սերգեյ Կոպիրկինը Երևանում իրեն զգացել է ինչպես տանը և հայտնվել հոգեհարազատ մարդկանց շրջապատում։ Այդ մասին դիվանագետն ասել է Sputnik Արմենիային տված բացառիկ հարցազրույցում։
«Հայաստանը նաև առանձնահատուկ է։ Ես ինձ անմիջապես զգացի ինչպես տանը, հայտնվեցի հոգեհարազատ մարդկանց շրջապատում, որոնք ընդհանուր գաղափարներ և արժեքներ ունեն», — ասաց Կոպիրկինը։
Ռուս դիվանագետը համոզված է, որ այդ զգացողությունը ժամանակի ընթացքում միայն ամրանալու է և նոր բովանդակությամբ է լցվելու։
Կոպիրկինը պատմեց, որ Ռուսաստանում ևս նա բազմաթիվ հայ ընկերներ, գործընկերներ ունի։
«Նրանք հիանալի մարդիկ են, նվիրված են Ռուսաստանին և միևնույն ժամանակ, բնականաբար, առանձնահատուկ զգացողություններ են տածում Հայաստանի հանդեպ», — կարծում է դիվանագետը։
Կոպիրկինը նշեց, որ իրեն շատ են պատմել Հայաստանի գեղեցկությունների, հին վանքերի, բացառիկ լեզվի, ավանդույթների մասին։ Հիմա նա այդ ամենը սեփական աչքերով տեսնելու հնարավորություն ունի։
Մինչ դեսպանի պաշտոնը ստանձնելը Կոպիրկինը Հայաստանում եղել է ընդամենը մեկ անգամ` 2007 թվականի խորհրդարանական ընտրությունների ժամանակ` որպես դիտորդ։ Այն ժամանակ նա նույնիսկ չի էլ պատկերացրել, որ Հայաստան կգա դեսպանի կարգավիճակում։
«Գիտե՞ք` դեռ Միխայիլ Լերմոնտովն էր խոսում ռուս մարդու ապշեցուցիչ ունակության մասին, երբ նա հարմարվում է այն ժողովուրդների ավանդույթներին, որոնց հետ ապրում է հանգամանքների բերումով։ Դիվանագիտական ծառայությունը տարբերվում է նրանով, որ դիվանագետը պետք է ընկղմվի երկրի խնդիրների մեջ, ուսումնասիրի մանրամասները, ավելի շատ ճանաչի ժողովրդի ավանդույթները և ոգին», — ասաց Կոպիրկինը։
Նշենք, որ Կոպիրկինը ՀՀ-ում Ռուսաստանի արտակարգ և լիազոր դեսպան է նշանակվել Ռուսաստանի նախագահ Վլադիմիր Պուտինի` 2018 թվականի ապրիլի 6-ի հրամանով։
Դիվանագետը Ռուսաստանի արտաքին գործերի նախարարության համակարգում աշխատում է 1985 թվականից։ Արտերկրում Ռուսաստանի ԱԳՆ կենտրոնական աշխատակազմում աշխատելու մեծ փորձ ունի։ 2006-2011 թվականներին զբաղեցրել է Ռուսաստանի ԱԳՆ-ի ԱՊՀ երկրների առաջին դեպարտամենտի փոխտնօրենի պաշտոնը։ Իսկ 2011-2018 թվականներին եղել է Բրյուսելում ԵՄ և Եվրատոմին կից մշտական ներկայացուցչի տեղակալը։ Տիրապետում է անգլերենի և ֆրանսերենի։
