ԵՐԵՎԱՆ, 4 հուլիսի — Sputnik. Հայաստանի բասկետբոլի տղամարդկանց հավաքականը Եվրոբասկետ-2021-ի նախընտրական երկրորդ փուլի առաջին հանդիպումը պետք է անցկացնի սեպտեմբերի 13-ին Ավստրիայի հետ, բայց այդ խաղը կարող է և չկայանալ, քանի որ հավաքականը ֆինանսներ չունի:
Հայաստանի բասկետբոլի ֆեդերացիայի փոխնախագահ Արա Պողոսյանն այսօր` հուլիսի 4-ին, հրավիրված ասուլիսի ժամանակ նշեց, որ այնքան շատ խնդիրներ ունեն, որ չեն կարողանում հասկանալ արդյոք լավ է, որ հաղթահարել են նախընտրական առաջին փուլը։
«Պետական մոտեցումը բացակայում է, ֆինանսավորում այլևս չունենք, ու եթե այսպես շարունակվի, իմաստ չունի, որ թիմը խաղա»,- ավելացրեց փոխնախագահը:
Բանն այն է, որ պետական ֆինանսավորումը, որը հատկացված է եղել հավաքականին արդեն վերջացել է: Իսկ առաջիկայում մեր թիմը դեռևս հանդիպումներ ունի անցկացնելու Ավստրիայում և Մեծ Բրիտանիայում: Ու բնականաբար մրցակցի հարկի տակ անցկացվող խաղերի համար գումար է հարկավոր գոնե մրցավայր ժամանելու համար:
Թե ինչպես կլուծվի այս հարցը, ցույց կտա ժամանակը: Փաստորեն հավաքականին մասնակի ֆինանսավորում է միայն ՀԱՕԿ-ը, իսկ պետության կողմից բասկետբոլի տարիքային բոլոր հավաքականներին հատկացված 28 մլն դրամը նույնիսկ բավական չէ մեկ ուղևորության համար:
Բասկետբոլի ֆեդերացիայի գլխավոր քարտուղար Արթուր Նազարյանն էլ նշեց, որ Երևանում կայանալիք հանդիպումների անցկացումն էլ է հարցականի տակ։
«ՖԻԲԱ-ն (Բասկետբոլի միջազգային ֆեդերացիա) պահանջում է համապատասխանեցնել խաղահրապարակը պահանջվող պայմաններին: Այսինքն պետք է փոխվեն զամբյուղներն ու լուսատախտակը, ինչը կարժենա 60-70 հազար դոլար: Իսկ մենք այս պահին գումարի խնդիր ունենք: Եթե այսպես շարունակվի, միգուցե և սեփական հարկի տակ խաղերը անցկացնենք այլ երկրում»,- ասաց Նազարյանը:
Հայաստանի բասկետբոլի հավաքականի վերածնունդը մեծ խանդավառություն առաջացրեց երկրպագուների շրջանում: Հավաքական հրավիրվեցին հայազգի բասկետբոլիստներ տարբեր երկրներից, թիմն ունի բարձրակարգ մարզիչ, ու արդյունքներն էլ երկար սպասել չտվեցին: Սակայն հիմա ֆինանսների բացակայության պայմաններում հավաքականը ստիպված է տնտեսել ֆինանսները` ԱՄՆ-ում բնակվող մեր բասկետբոլիստներին չհրավիրելով հավաքական։
«Միակ բանը, որը հավաքականը ստանում է անվճար, մարզահագուստն է, մնացածի համար ստիպված ենք գումարներ հայթայթել»,- նշեց Նազարյանը:
Հիմա բասկետբոլի ֆեդերացիան, չնայած դժվարություններին, փորձում է հովանավորներ գտնել իրավիճակին լուծում տալու համար: Եվ միանշանակ ասել, որ հավաքականի ելույթները կշարունակվեն, դժվար է: Մի բան է պարզ` ազգային կանգնած է լուծարման եզրին:
