ԵՐԵՎԱՆ, 5 հուլիսի – Sputnik. Գեղարքունիքի մարզի Արտանիշ գյուղի տարածքում նախօրեին կորած երկու երեխաներին գտել են Ծափաթաղում։ Sputnik Արմենիայի հետ զրույցում ասաց Գեղարքունիքի մարզի Շողակաթ խոշորացված համայնքի ղեկավար Սուլիկո Շուշանյանը։
«Նրանք ժիր, բաևոյ երեխաներ են։ Իրանց եթե վեռտալյոտով տանեն Կիրովաբադ, իջացնեն, կգան կհասնեն իրանց տուն»,- ասաց Շուշանյանը։
Նա պատմեց, որ երեխաներն իրենց անասնապահական ֆերմայում են եղել, այնտեղ են աշխատել։
«Աշխատանքը երևի ծանր է եղել կամ նման մի բան, թողել-գնացել են։ Մի քանի ժամ չեն երևացել, բոլորը խառնվել են իրար` էլ փրկարար, էլ կամավոր, էլ ոստիկանություն»,- ասաց համայնքի ղեկավարը։
Երեխաները Արտանիշից հասել են Ծափաթաղ ու գնացել բարեկամի տուն։
«Ամենավատ բանն էինք մտածում։ Դե Ադրբեջանը կպած ա։ Լակոտներ են էլի, ինչ-որ բանից նեղանան, թողնեն գնան, խայտառակ լինենք»,- ասաց Շուշանյանը։
Ավելի վաղ հայտնել էինք, որ հուլիսի 5-ին, ժամը 01։51-ին «911» ծառայությունն ահազանգ էր ստացել Արտանիշ գյուղի բնակիչներ Է. Ղ.-ի (2003 թ.) և Է. Ղ.-ի (ծնվ.2007թ.) մասին։ Նրանք հուլիսի 4-ին, ժամը 05։30-ի սահմաններում ֆերմայից դուրս էին եկել և չէին վերադարձել տուն։
