ԵՐԵՎԱՆ, 6 հուլիսի — Sputnik. Ընտրական օրենսգրքի փոփոխություններին նվիրված քննարկումներն ԱԺ-ում շարունակվում են: Առաջարկություններ ներկայացնելու հերթն այսօր «Ծառուկյան» դաշինքինն էր:Խմբակցության անդամներն առաջարկում են անցնել ամբողջովին համամասնական ու փակ ցուցակներով ընտրակարգի։
Գործող խառը ընտրակարգով ընտրության անցկացումը «Ծառուկյան» դաշինքում ժողովրդավարական չեն համարում: «Ամբողջությամբ համամասնական փակ ընտրակարգի անցնելու դեպքում ԱԺ ընտրությունները չեն անձնավորվի, և կբարձրանա դրանց քաղաքական նշանակությունը»,- առաջարկները ներկայացնելով` ասաց Սերգեյ Բագրատյանը։
ՀՅԴ-ն այս առաջարկը չի ընդունում, նրանց համոզմամբ «փակ ընտրացուցակները հակասում են ժողովրդավարությանը:
ԲՀԿ-ն առաջարկում է նաև արգելել համատիրություններին՝ քարոզարշավների ընթացքում իրենց գրասենյակներն օգտագործել որպես որևէ կուսակցության կամ դաշինքի նախընտրական շտաբ։
«Նախորդ ընտրությունների ընթացքում համատիրությունները կազմակերպում էին քարոզչություն՝ ի նպաստ հանրապետական կուսակցության, որովհետև փաստացի գտնվում էին նրանց հսկողության ներքո»,- ասաց Սերգեյ Բագրատյանը։
ԲՀԿ-ն առաջարկում է նաև հրաժարվել ընտրողին օգնելու կարգից և թույլ չտալ, որ նույն անձն օգնի մեկից ավելի ընտրողի։
ԲՀԿ-ն ճշտել է` 2017թ. խորհրդարանական ընտրությունների ընթացքում 79.500 քաղաքացի քվեարկել է այլ անձի օգնությամբ, այն դեպքում, երբ Աշխատանքի և սոցիալական հարցերի նախարարությունից ստացված տվյալներով` ընտրական իրավունք ունեցող այն անձինք, ովքեր ուղեկցորդի կարիք ունեն, ընդամենը 15.250-ն են:
ԲՀԿ-ն առաջարկում է նաև հավասար պայմաններ ապահովել զորամասերում նախընտրական քարոզչություն իրականացնող քաղաքական ուժերի համար, ավելացնել եթերաժամանակ ու սահմանափակել ընտրատեղամասերում միաժամանակ 15-ից ավելի լրագրողների ներկայությունը:
Հաջորդ նիստի ընթացքում ներկա կլինեն նաև վարչապետին առընթեր ընտրական օրենսդրության բարեփոխումների հանձնաժողովի ներկայացուցիչները։
ԱԺ ընտրական օրենսգրքի բարեփոխումների աշխատանքային խմբի հաջորդ նիստը որոշվեց անցկացնել հուլիսի 10-ին` դրան հրավիրելով կառավարության ներկայացուցչի, ով պետք է պատասխանի քննարկումների ընթացքում կուտակված մի շարք հարցերի:
