ԵՐԵՎԱՆ, 9 հուլիսի — Sputnik. Կոռուպցիոն բացահայտումները կարող են հասնել Սերժ Սարգսյանի տուն։ Այսօր լրագրողների հետ զրույցում, անդրադառնալով վերջին օրերին Սարգսյանների ընտանիքում կատարված օպերատիվ գործողություններին` ասաց ՀՀ վարչապետ Նիկոլ Փաշինյանը։
«ԱԱԾ-ի առաջ ես խնդիր չեմ դնում, որ գնացեք, խոշոր բացահայտումներ արեք։ Ես ասում եմ, որ պետք է լինի օրինականություն։ Մարդկանց թվում է, թե մենք կառավարությունում ասում ենք` այսօր գնացեք, բերման ենթարկեք Սերժ Սարգսյանի եղբորը` Ալեքսանդր Սարգսյանին, և գնում են` բերման ենթարկելու»,-ասաց Փաշինյանը` միաժամանակ նշելով, թե ինչ նախապատմություն է ունեցել Սարգսյանների ընտանիքի հետ կապված` Մարտիրոս Սարյանի նկարների հափշտակության մասին բացահայտումը։
«Եղել է քաղաքացի, ով եկել, ինձ ասել է, որ իր ձեռքից խլել են այդ նկարները։ Ես մակագրեցի հարցը ԱԱԾ-ին; ԱԱԾ-ն հրավիրել է քաղաքացուն։ Նա հաղորդում է տվել հանցագործության մասին, և գործին ընթացք է տրվել»,- ասաց Փաշինյանը։
Լրագրողների հարցին, թե հնարավո՞ր է, որ բացահայտումները նաև Սերժ Սարգսյանի տուն ու հենց նրան հասնեն, Փաշինյանը պատասխանեց. «Եթե պետք լինի, որ հասնի, կհասնի։ Դա ոչ թե ես եմ որոշում, այլ փաստերն են որոշում, ընթացակարգերը, օպերատիվությունն ու օրենքով սահմանված կարգերն են որոշում»,- ասաց նա` վստահեցնելով, որ Հայաստանում ոչ մի անձեռնմխելի մարդ չկա։
