ԵՐԵՎԱՆ, 17 հուլիսի — Sputnik. Յուրաքանչյուր երեխա պետք է երազի իր ապագայի մասին, գտնի այն գործը, որով ուզում է զբաղվել ու անպայման սիրի այն։ Համոզված է ՀՀ նախագահ Արմեն Սարգսյանը։
Այսօր Հայաստանի նախագահի նստավայրում աստղադիտում էր կազմակերպվել։ Միջոցառմանը մասնակցել են մոտ 50 երեխաներ (այդ թվում նաև հաշմանդամություն ունեցող) ու նրանց ծնողները։
«Երեխաները պետք է երազեն ապագայի մասին, գտնեն այն, ինչ սիրում են։ Այն ամենը, ինչ նրանք անում են, պետք է սիրով անեն։ Ազատ մտածեն, ազատ ինքնադրսևորվեն», – լրագրողների հետ զրույցում ասաց Սարգսյանը։
Նա համոզված է, որ յուրաքանչյուր երեխա տաղանդավոր է, սակայն ծնողներն ու դպրոցը պետք է օգնեն նրան բացահայտել այդ տաղանդը։
Արմեն Սարգսյանը վստահ է` Հայաստանում բարձր է գիտական ներուժի զարգացման մակարդակը։ Թեև Հայաստանը բնական պաշարներով հարուստ չէ, սակայն այն կարող է դառնալ մտքի երկիր, մտքի, որը կարող է մրցվել աշխարհի լավագույն ուղեղների հետ։
