ԵՐԵՎԱՆ, 17 հուլիսի — Sputnik. Մշակույթի նախարար Լիլիթ Մակունցը վաստակել է ՀՀ վարչապետ Նիկոլ Փաշինյանի վստահությունը։ Հենց այդ պատճառով էլ նա այսօր նախարար է։ Այս մասին Մակունց ասաց այսօր լրագրողների հետ զրույցում։
«Վարչապետն ինձ վստահում է, ու ես կանեմ ամեն ինչ` այդ կարգավիճակում ժողովրդին ծառայելու համար», – ասաց Մակունցը։
Նա հույս հայտնեց, որ այսուհետ կառավարությունում ավելի շատ կին կլինի, նաև խոստացավ, որ ջանք կգործադրի այդ ուղղությամբ։
Նախարարն անդրադարձել է նաև գերատեսչության գործունեությանն ու հայտնել է, որ մշակույթի նախարարությանն առընթեր կստեղծվի մի կառույց, որն անկախ նախարարի անձից կամ երկրում տիրող քաղաքական իրավիճակից, կաշխատի իր մշակած ռազմավարությամբ։
«Նախարարությունը թելադրում է ոլորտի քաղաքականությունը, սակայն ռազմավարությունը պետք է մշակվի դրա մշակույթի ներկայացուցիչների հետ համատեղ», – ասաց Մակունցը։
Գերատեսչությունը մտադիր է ստեղծել մրցունակ ոլորտ, որը կոգևորի մշակույթի ու արվեստի գործիչներին ու կբարձրացնի նրանց առաջարկած «ապրանքի» որակը։
«Օրիգինալ չեմ լինի, եթե ասեմ, որ մշակույթի գործիչներից արվեստի գործերի, այլ ոչ թե զանգվածային օգտագործման բաների ստեղծում եմ ակնկալում։ Կարծում եմ` դա կարևոր է պետական կառույցների, Հայաստանի քաղաքացիների համար», – ասաց Մակունցը։
Նախարարը մտադիր է նաև լուծել ապակենտրոնացման խնդիրը. մշակութային կյանքը պետք է եռա ոչ միայն մայրաքաղաքում։
Հիշեցնենք` Լիլիթ Մակունցն այդ պաշտոնում է նշանակվել մայիսի 12–ին։ Նա բանասիրական գիտությունների թեկնածու է, անգլերենի մասնագետ, Հայ–Ռուսական (Սլավորանական) համալսարանի ավագ դասախոս։ Նախկինում միշտ աչքի է ընկել ընդդիմադիր դիրքորոշմամբ։
Նախկինում մշակույթի նախարարի պաշտոնը զբաղեցնում էր Արմեն Ամիրյանը։ «Թավշյա հեղափոխությունից» հետո, մայիսի 2–ին նա հայտնել էր, որ լքում է պաշտոնը։
