ԵՐԵՎԱՆ, 17 հուլիսի — Sputnik. Հայաստանի առողջապահության նախարարությունը փորձ կանցկացնի զինկոմիսարիատի բժշկական հանձնաժողովի հետ։ Այս մասին Կենտրոնական հավաքակայանում լրագրողների հետ հանդիպման ժամանակ ասաց ՀՀ առողջապահության նախարար Արսեն Թորոսյանը։
Նա նշեց, որ զորակոչիկներին պիլոտային ռեժիմով կզննեն ոչ թե զինկոմիսարիատում, այլ քաղաքացիական պոլիկլինիկաներում։ Փորձն ընթանում է Նոր Նորքի զինվորական կոմիսարիատում։
«Դա դրել ենք որպես փորձ՝ հասկանալու համար, եթե լավ աշխատի, ապա տարածենք նաև մյուս զինկոմիսարիատների վրա», — ասաց Թորոսյանը։
Նախարարը նշեց, որ կոռուպցիոն ռիսկերը մնում են, բայց բժիշկները պետք է իմանան, որ նման խախտումների համար կպատժվեն։
Ավելի վաղ Հայաստանի ՊՆ Կենտրոնական ռազմաբժշկական հանձնաժողովի նախագահ Սահակ Օհանյանն ասել էր, որ բանակից վաղաժամ ազատվելու դեպքերի կեսից ավելին կապված է հիվանդությունների հետ, որոնք չի հաջողվել բացահայտել զորակոչի ժամանակ։