ԵՐԵՎԱՆ, 19 հուլիսի — Sputnik. Հայաստանի իշխանությունները շարունակում են բանակցել նոր երկաթգծի շուրջ, բայց արդեն «մնացորդային սկզբունքով»։
Հայաստանի տրանսպորտի, կապի և տեղեկատվական տեխնոլոգիաների նախարար Աշոտ Հակոբյանը Sputnik Արմենիայի թղթակցի հետ զրույցում հայտնեց, որ Իրան —Հայաստան երկաթգծի նախագիծը հիշատակվում է բանակցություններում, բայց գործը կոնկրետության չի հասնում։
«Մենք բարձրացնում ենք այդ հարցը, քանի որ չենք ուզում հանել օրակարգից, բայց առաջընթաց առայժմ չկա ու առաջիկայում դժվար էլ լինի», — ասաց նախարարը։
Դեռ 2013 թվականին Հայաստանի տրանսպորտի նախարարությունը երկաթգծի ներդրումների վերաբերյալ հուշագիր էր ստորագրել Դուբայում գրանցված «Ռասիա ՖԶԷ» ներդրումային ընկերության հետ։
Դրանից հետո ընկերությունը ոչ մի անգամ չի ներկայացել հանրությանը։ Նախկին նախարար Վահան Մարտիրոսյանն ասում էր` նախարարությունը պնդում է, որ հանդիպում լինի ու ապագա աշխատանքը քննարկվի, բայց ընկերությունը խուսափում է հանդիպումից։
Այդ ժամանակից ի վեր հանդիպում չի եղել։ Նոր նախարարն ասում է, որ նույնիսկ նամակագրություն չի եղել։
Հիշեցնենք` այն ժամանակ` 2013 թվականին, նախագծի արժեքը 3,2 միլիոն դոլար էր գնահատվում։ Ճանապարհը պետք է անցնի իրանական սահմանից դեպի Սևան լիճ, իսկ հետո միանա գործող ճանապարհներին։