Ադրբեջանը քչացրել է հրադադարի խախտման դեպքերի քանակը։ Այս մասին այսօր Ստեփանակերտում մամուլի ասուլիսի ժամանակ ասաց Արցախի Պաշտպանության բանակի հրամանատար գեներալ–լեյտենանտ Լևոն Մնացականյանը` մեկնաբանելով իրավիճակն առաջնագծում։
«Ինչպես նախորդ տարի, այնպես էլ այս տարի Ադրբեջանի ռազմաքաղաքական ղեկավարությունը շարունակում է ռազմատենչ հայտարարություններ անել», –ասաց Մնացականյանը։
Նրա խոսքով` Ադրբեջանը պարբերաբար հայտարարում է, որ հակամարտության լուծման ուժային տարբերակը միակն է։ Վերջին անգամ դա արվեց հունիսին, ընդ որում` ոչ միայն սեփական լսարանի, այլև համաշխարհային հասարակության առջև։
Մնացականյանի խոսքով` մարտ ամսից Ադրբեջանն ակտիվ ռազմական միջոցառումներ է իրականացնում, այդ թվում` ուժերի տեղաբաշխում և զորավարժություններ։
«Մենք հսկում ենք այդ ամենը, որոշ ուղղություններում հետևել ենք նրանց գործողություններին», – ասաց Մնացականյանը։
Նախարարը նշեց, որ անցնող կիսամյակում Ադրբեջանը առաջնագծի մասին տեղեկություններ ստանալու համար ակտիվորեն հետախուզություն էր իրականացնում, այդ թվում` անօդաչու թռչող սարքերով։ Նաև ակտիվացել են ինժեներային աշխատանքներն առաջնագծում։
Ինչ վերաբերում է հրադադարի ռեժիմին` ապա որոշ նվազում նկատվում է ։ Հուլիսի 23–ին հրադադարի մոտ 30 խախտում է գրանցվել (ընդհանուր առմամբ մոտ 200 կրակոց)։
«Առաջնագծում այսքան հանգիստ չի եղել», –ընդգծեց Մնացականյանը։
Նախորդ ամիսներին նկատվող կուտակումներն արդեն չկան։ Հիմնականում դրանք հետ են քաշվել։
Ընդ որում` նրա խոսքով, այդ իրավիճակը կարող է վկայել հակառակորդի նոր նախագծերի մասին։ Հատկապես, որ լոկալ միջադեպները կարող են հանգիստ լայնածավալ գործողություն դառնալ։
Մնացականյանի կարծիքով` լարվածությունը կարող է աճել սեպտեմբեր–հոկտեմբերին։
Հակառակորդի նպատակների մասին Sputnik Արմենիայի հարցին Մնացականյանը պատասխանեց, որ պաշտպանության բանակում հետազոտություններ էին անցկացրել` հակառակորդի հետագա գործողությունները պարզելու համար։ Նրա խոսքով` ցանկացած սադրանք հնարավոր է։
«Ցանկացած փոքր միջադեպ կարող է լայնածավալ գործողության վերածվել։ Սակայն մենք պատրաստ ենք բոլոր հնարավոր զարգացումներին` լինեն դրանք լոկալ, թե լայնածավալ», – ասաց Մնացականյանը։
Հիմա, նրա խոսքով, Պաշտպանության բանակի հիմնական խնդիրն առաջնագծի զինումն է, ինժեներական աշխատանքները, հետախուզության հնարավորությունների ընդլայնումը, սպառազինության համալրումը։
Որոշակի փոփոխություններ են արվել զորքերի ուսուցման մեջ` հաշվի առնելով հակառակորդի մանևրները։ Զորքերը պատրաստ են իրականացնել իրենց առջև դրված խնդիրները։
