ԵՐԵՎԱՆ, 25 հուլիսի — Sputnik. Վարչապետ Փաշինյանը հավատում է հայ բժիշկներին ու հայաստանյան առողջապահական համակարգին։ Այս մասին նա հայտնեց այսօր Երևանի պետական բժշկական համալսարանի գիտական խորհրդի հանդիսավոր նիստին, որի ժամանակ հանդիսավոր կերպով հանձնվեցին շրջանավարտների դիպլոմները։
«Ես և իմ ընտանիքի անդամները արտասահմանում բուժման փորձ չունենք և հույս ունեմ` առողջական խնդիրների բերումով չենք էլ ունենա։ Ամեն դեպքում` ես վստահում եմ ու հավատում եմ մեր առողջապահական համակարգին»,– պատասխանելով լրագրողների հարցերին, ասաց Փաշինյանը։
Իսկ շրջանավարտներին ուղղված շնորհավորական ելույթում վարչապետը հույս հայտնեց, որ բժշկի մասնագիտություն ընտրողներն առաջնորդվել են ոչ թե մաթեմատիկական հաշվարկներով, այլ «համոզմունքով ու հավատով, որ փոխելու են աշխարհը, առնվազն` բժշկական, առողջապահական աշխարհը»։
«Ես հույս ունեմ, որ այս առաքելությունից ոչինչ չի շեղի մեր այսօրվա շրջանավարտներին` ո՛չ բարեկեցությունը, ո՛չ փողը,– ասաց Փաշինյանը,– ես հավատում եմ ձեր առաքելությանը, ես հավատում եմ մեր առաքելությանը, ես հավատում են մեր ընդհանուր հաղթանակին»։
Հանդիսավոր միջոցառմանը ներկա էին, նաև կառավարության որոշ անդամներ։
Ապագա ռազմաբժիշկներին դիպլոմները հանձնեց պաշտպանության նախարար Դավիթ Տոնոյանը` ապրիլյան պատերազմի մասնակից հերոսների ներկայությամբ։
Կարմիր դիպլոմներ ստացող գերազանց առաջադիմությամբ շրջանավարտներին դիպլոմները հանձնեցին Առողջապահության նախարար Ասեն Թորոսյանն ու ԿԳ նախարար Արայիկ Հարությունյանը։
Բժշկական համալսարանի շրջանավարտներն այսօր Հիպոկրատի երդում տվեցին։ Այս տարի նրանք 1001 են` 24֊-ը` ռազմական բժիշկ: Շրջանավարտներից 217–ը օտարերկրյա քաղաքացիներ են, հիմնականում` Հնդկաստանից։
