ԵՐԵՎԱՆ, 29 հուլիսի — Sputnik. Երևանում ավտոմեքենան բախվել է բենզալցակայանի հենասյանը, ինչի հետևանքով վարորդն ու ուղևորները մարմնական վնասվածքներով տեղափոխվել են հիվանդանոցներ։
Ինչպես տեղեկացնում են ՀՀ ԱԻՆ մամուլի ծառայությունից, հուլիսի 29-ին, ժամը 18:33-ին «911» ծառայությանն ահազանգ է ստացվել, որ Երևան քաղաքի Մովսես խորենացու փողոցի թիվ 148 շենքի մոտակայքում տեղի է ունեցել ՃՏՊ. կա արգելափակված քաղաքացի, անհրաժեշտ է փրկարարների օգնությունը:
Դեպքի վայր են մեկնել ՀՀ ԱԻՆ ՓԾ Ճգնաժամային կառավարման ազգային կենտրոնի աղետների բժշկության կենտրոնի հերթապահ բժիշկը, հրշեջ-փրկարարական ջոկատից մեկ մարտական հաշվարկ և հատուկ նշանակության փրկարարական աշխատանքների իրականացման կենտրոնի փրկարարական ջոկատը:
Պարզվել է, որ «Opel Astra» մակնիշի ավտոմեքենան (վարորդի ինքնությունը չի հաջողվել պարզել) բախվել է «CPS» բենզալցակայանի հենասյանը, կա 4 տուժած:
Վարորդը և ուղևորներից մեկը՝ 18–ամյա Ա.Զ.–ն, հոսպիտալացվել են «Էրեբունի» ԲԿ, մյուս ուղևորը՝ 16–ամյա Տ. Պ.-ն հոսպիտալացվել է «Սրբ. Աստվածամայր» ԲԿ:
Բժիշկները վարորդի առողջական վիճակը գնահատել են ծանր, Ա. Զ.-ինը և Տ. Ա.-ինը՝ բավարար: Ուղևոր Ա. Պ.-ն չի տուժել:
